Хакеры атакавалі халадзільнікі ў еўрапейскіх крамах. Тэмпература ў маразільніках дасягала +55°C
Супермаркеты ў Швецыі, Бельгіі, Эстоніі і Люксембургу сутыкнуліся са збоямі ў халадзільных сістэмах пасля кібератак. Частка прадуктаў сапсавалася, іх даводзіцца выкідаць.
У Швецыі пацярпелі крамы сетак ICA і Coop, паведамляе тэлеканал SVT.
Уладальнік крамы ICA на востраве Эланд расказаў, што раніцай убачыў на падлозе лужыну вады. Тэмпература ў маразільнай камеры дасягнула +55°C. Паводле яго, усе халадзільнікі і маразільнікі выйшлі са строю, а прадукты былі сапсаваныя.
Краму ICA ў Шэбу давялося на пэўны час закрыць. Яе кіраўнік Рыкард Нільсан ацаніў кошт тавараў, якія, магчыма, давядзецца выкінуць, у суму да мільёна шведскіх крон.
«Зараз мы спусташаем маразільнікі, больш асабліва нічога не зробіш. Яны зноў пачынаюць ахалоджвацца, але ўсё сапсавана», — расказаў SVT кіраўнік крамы ў Санкт-Улафе.
Прадстаўнік ICA Густаў Нільсан паведаміў, што сетка расследуе інцыдэнт і дапамагае пацярпелым крамам.
Да працы далучыўся Нацыянальны цэнтр кібербяспекі Швецыі. Там паведамілі, што падтрымліваюць кантакт з пацярпелымі і высвятляюць абставіны атакі.
У Бельгіі праблемы закранулі дзясяткі крамаў Delhaize. Паводле агенцтва Belga, у ноч на панядзелак халадзільнае абсталяванне перавялі ў рэжым размарожвання.
Эстонская тэлерадыёкампанія ERR таксама паведаміла пра атаку на буйную гандлёвую сетку. Паводле яе, зламыснікі атрымалі аддалены доступ да камп’ютара, які кіраваў халадзільнай сістэмай крамы, і выставілі тэмпературу +50°C.
Пра пацярпелыя крамы ў Люксембургу паведаміла Reuters.
Падобная атака ўжо была ў Францыі
12 кастрычніка сотні французскіх крамаў сутыкнуліся з падобным інцыдэнтам: пасля кібератакі тэмпература ў халадзільніках і маразільніках павысілася.
Даследчык кібербяспекі Стакгольмскага ўніверсітэта Фрэдрык Блікс лічыць, што пастаўшчыкі халадзільнага абсталявання меліся зрабіць высновы з таго выпадку.
«Гэта ў пэўнай ступені правал пастаўшчыкоў халадзільнага абсталявання. Да гэтага варта было паставіцца больш сур’ёзна», — сказаў ён.
Цяпер чытаюць
«Пакінулі на некалькі гадзін аднаго на вакзале». Мужчына памёр пасля падзення з вышыні на працы1
«Пакінулі на некалькі гадзін аднаго на вакзале». Мужчына памёр пасля падзення з вышыні на працы
«Доктарка», адвакат, чалавек з камерай і некалькі дужых хлопцаў. У Петрапаўлаўскай Баршчагоўцы расійскія спецслужбы скарысталіся спецыфічным украінскім бізнэсам ваеннага часу1515
Каментары