Артылерыст-ідэолаг: топ-5 фактаў пра звольненага міністра Алега Праляскоўскага
Міністр інфармацыі Алег Праляскоўскі адпраўлены ў адстаўку. «Наша Ніва» узгадвае пяць фактаў з ягонага жыцця.
Артылерыст з Расіі
Алег Праляскоўскі нарадзіўся ў 1963 годзе ў Сергіевым Пасадзе, гэта мястэчка за 75 км ад Масквы.
А ў Беларусі ён атрымаў адукацыю, закончыўшы Мінскае вайсковае інжынернае зенітнае ракетнае вучылішча.
Пасля паехаў у Германію, служыць у тамтэйшай групе савецкіх войскаў. Ягоны дывізіён знаходзіўся за 40 км ад адной з НАТАўскіх баз, узгадваў Праляскоўскі.
Вярнуўшыся ў Мінск, ён служыў у ракетным вучылішчы, а пасля стаў выкладчыкам у Вайсковай акадэміі.
Паспеў, дарэчы, закончыць юрфак БДУ.
З войска на ідэалагічны фронт
Вайсковую кар’еру Праляскоўскі з цягам часу прамяняў на інфармацыйна-прапагандысцкую. З аналітычнага аддзела ў службе бяспекі прэзідэнта яго перавялі ў інфармацыйнае агенцтва БелТА, прычым адразу дырэктарам.
Адтуль Праляскоўскі перайшоў у Адміністрацыю прэзідэнта. Спачатку намеснікам кіраўніка, а пасля кіраўніком Галоўнага ідэалагічнага упраўлення.
У 2007 чыноўнік падаў у суд на «Народную волю» і журналістку Марыну Коктыш за абразу свайго гонару. Агулам Праляскоўскі атрымаў ад іх каля $12 тысяч.
У 2009 ён стаў міністрам інфармацыі. Пры ягоным папярэдніку Уладзіміру Русакевічу «Наша Ніва» спачатку была выключаная з каталога падпіскі «Белпошты» і шапікаў «Саюздрука», а пасля ў 2008 годзе вярнулася ў падпіску і продаж.
Ад Праляскоўскага-міністра «Наша Ніва» атрымала некалькі папярэджанняў, а ў сярэдзіне 2011 ягонае ведамства ініцыявала судовы працэс аб закрыцці газеты. Ад пазову прадстаўнік міністэрства адмовіўся ў залі суда.
Адной са сваіх задач на пасадзе міністра ён бачыў развіццё рэгіянальнай прэсы. Аднак «раёнкі» дагэтуль малапапулярныя і адыгрываюць на інфармацыйнай прасторы мінімальную ролю.
Сусед Пяткевіч
Як і іншым высокім чыноўнікам, Праляскоўскаму дазволілі пабудаваць катэдж у Драздах, на вуліцы Пакроўскай. Былому міністру належыць двухпавярховы цагляны дом з мансардай і альтанкай агульнай плошчай 455 м2.
Побач з ім пасялілася памочніца прэзідэнта Наталля Пяткевіч. Праз дарогу — мільянер Павел Тапузідзіс і былы спікер палаты прадстаўнікоў Вадзім Папоў.
Дачкі-прыгажуні
У сям’і былога міністра дзве дачкі.
Старэйшая, Вольга, некалі апублікавала ў часопісе «Беларуская думка» выкрывальны артыкул пра сацыяльныя сеткі. «Апаненты ўлады прыкрываюць свае намеры крадзенымі лозунгамі», «пратэст накіраваны на дэзынтэграцыю беларускага народа і фактычна пазбаўляе моладзь і грамадства той самай будучыні», — пісала яна пра дзейнасць «Рэвалюцыі праз сацыяльныя сеткі» ў Беларусі. А ў вольны ад вучобы час дзяўчына спявае. Сцэнічнае імя — Юліяна. Пад такім псеўданімам яна трапіла ў лік пераможцаў конкурсу «Зорны дыліжанс» у сярэдзіне 2000-х. Цяпер Вольга — маладая мама.
Малодшая Інга навучаецца ў Лінгвістычным універсітэце. Зрэшты, гэтую ўстанову скончыла і яе сястра. У акаўнце Інгі выкладзеныя яе здымкі з адпачынку. Каментуючы іх, дзяўчына наракае, маўляў, пакуль некаторыя яе сяброўкі ездзяць у Лондан, яна пяты раз запар адпачывае ў Сочы.
Паводле інфармацыі са старонкі «Укантакце», Інга працуе перакладчыцай у інфармацыйным агенцтве БелТА, якім раней кіраваў тата. У яе ёсць сын Ягор.
Тэлешоу на БТ
А вось такім быў Алег Праляскоўскі ў далукашэнкаўскую эпоху. Разам з аднай з дачок у 1994-м ён браў удзел у тэлешоу «Пяць зорак» на БТ. У эфіры ён намагаўся гаварыць па-беларуску, распавёў, што яго дачка вучыцца ў Рэспубліканскім ліцэі пры Акадэміі музыкі па класе цымбалаў.
Каментары