За ўчыненне асабліва цяжкага злачынства асуджаны 80-гадовы жыхар сельскага населенага пункта Баранавіцкага раёна.
Як паведаміў пракурор аддзела пракуратуры Брэсцкай вобласці Іна Пасюк, якая падтрымлівала дзяржаўнае абвінавачанне па справе, раніцай 21 лістапада 2013 года ў дом да 80-гадовага мужчыны прыйшлі два аднавяскоўцы: 77-гадовая жанчына і 80-гадовы мужчына. Разам яны распілі бутэльку гарэлкі.
«З паказанняў жанчыны вынікае, што гаспадар дома намякаў ёй на блізкія адносіны. І калі пенсіянерка стала сыходзіць, той пачаў наносіць ёй удары металічнай палкай і металічнай качаргой у вобласць галавы, — расказала Пасюк. — Акрываўленую пацярпелую на вуліцы ўбачылі аднавяскоўцы. Яны звярнуліся да медыкаў, пасля чаго пенсіянерку, якой было нанесена не менш за восем удараў, даставілі ў бальніцу».
Калі ўчастковы інспектар міліцыі прыйшоў у дом да пенсіянера, то знайшоў там збітага госця. Гаспадар дома нанёс яму металічнай качаргой і сякерай 18 удараў па розных частках цела. Праз сем дзён пацярпелы ад атрыманых траўм памёр у бальніцы.
28 лістапада пенсіянера затрымалі. Яго віна была ўстаноўлена і пацверджана рэчавымі доказамі, паказаннямі сведак, пацярпелай і шэрагам экспертыз. Псіхіятрычная экспертыза ўстанавіла, што мужчына пры свядомасці.
5 чэрвеня судовая калегія па крымінальных справах Брэсцкага абласнога суда на выязным пасяджэнні ў Баранавічах прыгаварыла яго да 16 гадоў і аднаго месяца пазбаўлення волі ў калоніі ўзмоцненага рэжыму, прызнаўшы вінаватым на падставе пп. 2 і 6 ч. 2 арт. 139 (забойства з асаблівай жорсткасцю заведама састарэлага) і арт. 153 (наўмыснае прычыненне лёгкага цялеснага пашкоджання, што пацягнула кароткачасовае расстройства здароўя) Крымінальнага кодэкса.
Згодна з прыгаворам з абвінавачанага спагнана ў выглядзе кампенсавання маральнага ўрону на карысць двух сваякоў загінулага па 30 млн. рублёў кожнаму.
Падчас папярэдняга расследавання і ў судовым пасяджэнні пенсіянер сваёй віны не прызнаў. Раней ён судзімы не быў. У доме, дзе было ўчынена забойства, абвінавачаны жыў адзін.
Прысуд яшчэ не набыў законную моц і можа быць абскарджаны.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА5
Каментары