Падчас тэракту на вайсковым посце ў Пакістане загінулі не менш за 15 чалавек
Не менш за 15 чалавек загінулі 24 ліпеня ў выніку тэракту, здзейсненага смяротнікам на вайсковым кантрольна-прапускным пункце ў правінцыі Хайбер-Пахтунхва на паўночным захадзе Пакістана. Адказнасць за напад узяла на сябе радыкальная групоўка «Тэхрык-і-Талібан Пакістан» (ТТП), паведамляе Reuters.
Паводле звестак пакістанскага войска, смяротнік накіраваў аўтамабіль, начынены выбухоўкай, у сцяну, якая атачала вайсковы пост. Магутны выбух забіў 12 вайскоўцаў, двух паліцыянтаў і аднаго цывільнага супрацоўніка.
Пасля выбуху пачалася перастрэлка. Паводле паведамлення вайскоўцаў, у ходзе бою былі забітыя 12 узброеных баевікоў.
Пакістанскае войска заявіла, што працягне барацьбу з тэрарызмам, які, паводле яго сцвярджэнняў, падтрымліваецца з-за мяжы. Аперацыя сіл бяспекі ў раёне нападу працягваецца.
Групоўка «Тэхрык-і-Талібан Пакістан», вядомая таксама як пакістанскія талібы, ужо шмат гадоў вядзе ўзброеную барацьбу за ўвядзенне ў краіне жорсткай інтэрпрэтацыі ісламскага права. Падчас вайны ў Афганістане частка яе ўдзельнікаў знайшла прытулак на афганскім баку мяжы.
Паводле ацэнак Арганізацыі Аб'яднаных Нацый, пасля вяртання талібаў да ўлады ў Афганістане ў 2021 годзе ТТП значна ўмацавала свае пазіцыі і павялічыла колькасць сваіх прыхільнікаў.
Улады Пакістана сцвярджаюць, што баевікі ТТП арганізуюць напады, дзейнічаючы з тэрыторыі Афганістана, куды пасля атак вяртаюцца. Афганскія ўлады гэтыя абвінавачанні адхіляюць і заяўляюць, што дзейнасць ТТП з'яўляецца выключна ўнутранай праблемай Пакістана.
У апошнія гады колькасць тэрактаў у паўночна-заходніх рэгіёнах Пакістана, асабліва каля афганскай мяжы, няўхільна расце. Толькі ў 2025 годзе ў выніку такіх нападаў загінулі сотні вайскоўцаў, супрацоўнікаў сілавых структур і мірных жыхароў. Незалежныя назіральнікі лічаць, што за большасцю гэтых атак стаіць менавіта групоўка ТТП.
Цяпер чытаюць
Сяргей Ціханоўскі запусціў свой ютуб-канал з вершамі і казкамі86
Каментары