Аляксандр Лукашэнка 25 ліпеня падчас рабочай паездкі ў Мінскі раён паставіў задачу ў кароткія тэрміны завяршыць уборку палеглых хлябоў, паведамляе прэс-служба прэзідэнта.
Кіраўнік дзяржавы заслухаў аператыўную інфармацыю аб стане пасеваў зерневых культур. Ён падкрэсліў, што «самая галоўная задача, якая стаіць сёння перад аграрыямі, — максімальна хутка ўбраць гэтак званую палегліцу, каб не дапусціць страт ураджаю».
«Як бы ні было складана, гэты хлеб трэба ўбраць вокамгненна. Максімум тры-чатыры дні. Галоўная задача сёння — убраць палеглыя пасевы. Гэта мяне больш за ўсё хвалюе. Усё астатняе мы зробім, — сказаў Лукашэнка. — Шкада будзе хлеба, які вырас, калі мы яго не возьмем. Страціць такі хлеб — гэта злачынства».
Лукашэнка даручыў Камітэту дзяржкантролю і іншым спецыялістам пракантраляваць выкананне гэтага даручэння.
«Праз два-тры дні праверце і знайдзіце, дзе кепска працуюць з палеглымі зерневымі. Гэта тычыцца ўсіх абласцей», — сказаў ён.
Лукашэнка даручыў надаць пільную ўвагу структуры пасеваў і выкарыстоўваць найбольш устойлівыя гатункі. «Давайце пасеем тое, што, вы лічыце, здольнае выстаяць супраць ліўняў і іншага. Трэба рабіць усё для таго, каб захаваць ураджай і змагацца з гэтай палегліцай», — сказаў кіраўнік дзяржавы.
Ён даручыў у наступным годзе такім чынам арганізаваць пасяўную ва ўсім Мінскім раёне, каб можна было параўнаць атрыманыя вынікі і вызначыць эфектыўнасць.
Гаворачы пра структуры пасеваў, Лукашэнка запатрабаваў адмовіцца ад заведама стратных і даручыў Мінсельгасхарчу «больш дакладна даводзіць рэкамендацыі аграрыям па прадукцыйнасці і рэнтабельнасці тых ці іншых гатункаў і культур».
«Рабіце высновы з сёлетняй пасяўной і ўборачнай і выдавайце рэкамендацыі ўжо зыходзячы з вопыту», — адзначыў Лукашэнка.
Кіраўніка дзяржавы праінфармавалі аб ходзе ўборачнай кампаніі і відах на ўраджай. Па стане на 25 ліпеня па краіне зерневыя і зернебабовыя культуры ўбраныя на 549 тыс. га, што складае 22,6% ад агульнай плошчы пасеваў. Намалочана больш як 2,1 млн. тон пры сярэдняй ураджайнасці 39 ц/га. Рапс ужо ўбраны на 94% плошчаў. Намалочана 753,1 тыс. тон пры сярэдняй ураджайнасці 22,5 ц/га. Чакаецца, што валавы збор зерня без уліку кукурузы ў сельгасарганізацыях у свірнавой вазе складзе амаль 8 млн. тон.
Лукашэнка таксама наведаў у Мінскім раёне зернесушыльны комплекс, дзе азнаёміўся з арганізацыяй прыёмкі, сушкі, дапрацоўкі і захоўвання зерня і азімага рапсу.
Каментары