Перамовы аб арганізацыі сустрэчы ў фармаце Украіна — дзяржавы МС — Еўрасаюз працягваліся больш за два тыдні, пры гэтым па патрабаванні расійскага боку неаднаразова змянялася месца яе правядзення.
Пра гэта Еўрапейскай праўдзе паведамілі інфармаваныя дыпламатычныя крыніцы.
Паводле дадзеных суразмоўцы, варыянты перамоў у Маскве і Кіеве не разглядаліся як апрыёры невыканальныя. Першапачаткова гаворка ішла аб сустрэчы прэзідэнтаў Пуціна і Парашэнка «на нейтральнай тэрыторыі».
Спачатку кансультацыі вяліся аб двухбаковых перамовах, потым — аб шматбаковых.
«Першапачаткова былі сігналы пра згоду Пуціна на новую сустрэчу ў Нармандыі, па запрашэнні прэзідэнта Францыі Аланда. Ужо рыхтаваліся да яе. Але праз некалькі дзён Масква нечакана адмовілася ад сваіх слоў», — распавёў адзін з дыпламатаў.
Іншая крыніца ўдакладніла, што пасля ў якасці пляцоўкі разглядаўся Берлін, але таксама не была дасягнута згода бакоў.
Фармат з удзелам прэзідэнтаў краін Мытнага саюза з'явіўся па ініцыятыве Крамля.
На тым этапе было ўзгоднена іншае месца сустрэчы — сталіца Казахстана Астана. Паводле дамоўленасці, дасягнутай па дыпламатычных каналах, Украіна павінна забяспечыць удзел прадстаўнікоў ЕС, хоць Брусель у той перыяд не гарэў жаданнем станавіцца бокам перамоваў.
«Узгадніць гэта з ЕС было няпроста. Але як толькі мы гэта зрабілі, з Масквы паступіла новая пазіцыя — яны ўжо не хацелі ў Астану і паставілі ўмову, што сустрэча павінна адбыцца ў Мінску і толькі ў Мінску. Можаце ўявіць рэакцыю Еўракамісіі — бо яны паказальна ўстрымліваюцца ад кантактаў з уладамі Беларусі», — распавёў адзін з дыпламатаў.
Суразмоўца дадаў, што цяпер разглядаюцца магчымасці яшчэ адной сустрэчы Парашэнка-Пуцін, якая можа адбыцца на гэтым тыдні з удзелам іншага пасярэдніка.
Цяпер чытаюць
У Чэхіі малады беларус трапіў у кому — наглытаўся таблетак праз праблемы з легалізацыяй і разрыў з дзяўчынай7
Каментары