Лідскім раённым аддзелам Следчага камітэта распачата крымінальная справа па п. 12 ч. 2 арт. 139 Крымінальнага кодэкса Рэспублікі Беларусь (наўмыснае забойства з карыслівых меркаванняў) у дачыненні да жыхара Баранавіцкага раёна Брэсцкай вобласці 1986 года нараджэння, паведамляе прэс-служба Следчага камітэта.
Устаноўлена, што 28 лістапада ў лясным масіве каля вёскі Сялец Лідскага раёна падазраваны, які знаходзіўся ў стане алкагольнага ап'янення, у ходзе канфлікту нанёс тры ўдары абухом сякеры па галаве мясцовай жыхарцы 1970 года нараджэння, якая працавала прадаўцом у краме. Ад атрыманых цялесных пашкоджанняў жанчына памерла на месцы.
Абшукаўшы кішэні ахвяры, падазраваны дастаў ключы ад крамы, прабраўся ў гандлёвую кропку, пасля чаго выкраў звыш 5 мільёнаў рублёў выручкі і тытунёвыя вырабы. Выходзячы з крамы, ён сутыкнуўся з сынам забітай жанчыны.
Пагражаючы хлопцу нажом, збег, сеўшы ў дызель-цягнік, які рухаўся ў Баранавіцкі раён.
Выявіўшы цела маці, хлопец паведаміў аб выпадку ў міліцыю. Дзякуючы аператыўна прынятым мерам падазраваны быў затрыманы супрацоўнікамі міліцыі і зняты з цягніка на станцыі Наваельня Дзятлаўскага раёна.
Улічваючы характар злачынства, крымінальную справу прынялі да сваёй вытворчасці следчыя абласнога ўпраўлення Следчага камітэта, якія спецыялізуюцца на расследаванні падобных супрацьпраўных дзеянняў.
З затрыманым праводзяцца следчыя дзеянні. Устаноўлена, што раней ён неаднаразова прыцягваўся да крымінальнай адказнасці за карыслівыя злачынствы.
Выкрадзеныя з крамы грашовыя сродкі і цыгарэты канфіскаваныя і разам з прыладай злачынства прызнаныя следствам рэчавымі доказамі. Прызначаны шэраг экспертных даследаванняў. Канчатковая прававая ацэнка дзеянням падазраванага будзе зроблена пасля завяршэння расследавання крымінальнай справы.
Цяпер чытаюць
На Мінскім паўмарафоне памёр 50‑гадовы бягун. Вось што вядома пра Аляксея Дашыневіча21
Каментары