Вірусы на тэлефонах шпіёняць пры выключаным апараце і хаваюцца ў сім-картах
Калі першае мусіць турбаваць толькі аматараў перапрашывак, другое магло зачапіць мільярды людзей па ўсім свеце.
Пра вірус, які можа працягваць выкарыстоўваць рэсурсы сістэмы нават пры выключаным тэлефоне, паведаміў распрацоўшчык антывірусаў AVG.
Спецыялісты адзначаюць: смартфон, які заразіўся вірусам Android/PowerOffHijack.A, насамрэч працягвае працаваць, калі карыстальнік думае, што выключыў смартфон. Па «выключэнні» паказваецца адпаведная анімацыя і гасне дысплэй, але смартфон нават тады можа запісваць гук, рабіць здымкі і адсылаць паведамленні. Толькі выманне батарэі можа канчаткова адключыць тэлефон.
Вірус зрабіў каля 10 тысяч смартфонаў пераважна ў Кітаі дасканалымі шпіёнскімі прыладамі.
Шкодная праграма распаўсюджваецца ў папулярных у Кітаі неафіцыйных магазінах праграм. Але для яе дзейнасці патрэбны рут-доступ (правы адміністратара), таму большасці звычайных карыстальнікаў, якія не ўмешваліся ў заводскую прашыўку, ён не пагражае. Вірус працуе толькі на смартфонах з Android старэйшых за 5.0 версій, ён распазнаецца апошнімі версіямі антывірусаў.
Аб больш сур’ёзнай пагрозе мабільнай бяспецы распавёў экс-супрацоўнік Агенцтва нацыянальнай бяспекі ЗША Эдвард Сноўдэн.
Паводле прадстаўленых Сноўдэнам матэрыялаў, спецслужбы скралі шыфравальныя ключы найбуйнейшага ў свеце вытворцы сім-карт Gemalto.
Скрадзеныя ключы дазваляюць кантраляваць большую частку размоў па мабільных тэлефонах без ведама аператара і расшыфроўваць паведамленні. Gemalto працуе ў 85 краінах свету, вырабляе сім-карты, а таксама чыпы для мабільных тэлефонаў і банкаўскіх карт. Штогод з яе 40 заводаў выходзяць каля двух мільярдаў «сімак».
Адзіны спосаб абараніцца ад праслухоўвання — карыстацца для сувязі адмысловымі праграмамі з дадатковым шыфраваннем. Выданне The Intercept рэкамендуе Signal, RedPhone і Silent Phone альбо надзейна абароненыя мэсэнджэры і сэрвісы электроннай пошты.
Пракуратура пра смерць Мелказёрава: журналіст меў хранічную хваробу17
Каментары