Францыя накіравала заходняй суседцы Беларусі тактычную аб'яднаную падгрупу войск, аснову якой складаюць 15 танкаў Leclerc, паведаміў аўтарытэтны часопіс IHS Jane's Defence Weekly
Такім чынам, Польшча атрымлівае бранятанкавую падтрымку ўжо ад чацвёртай краіны за апошні год — раней палякі праводзілі сумесныя вучэнні з танкавымі сіламі ЗША, Брытаніі і Нямеччыны.
Танкі AMX-56 Leclerc названыя ў гонар генерала Філіпа Леклерка, які камандаваў французскай танкавай дывізіяй пры вызваленні Парыжа ад нямецкіх акупантаў у жніўні 1944 году. Машына, распрацаваная ў 1980-я гады, важыць каля 57 т, узброеная 120-мм пушкай, экіпаж — 3 чалавекі. Хуткасць — да 72 км/г.
Французская групоўка складаецца з 15 танкаў і аддзелаў пяхоты і сапёраў на больш лёгкай бранятэхніцы. Яны адправіліся ў шлях 20 красавіка і прабудуць у Польшчы 2 месяцы, каб браць удзел у розных сумесных вучэннях.
Згодна з заявамі французскіх урадоўцаў, кантынгент прадэманструе Варшаве і іншым усходнееўрапейскім сябрам НАТА гатоўнасць заходніх хаўруснікаў абараніць іх у выпадку канфлікту.
Вясной 2014 года Францыя ўжо накіроўвала 4 знішчальнікі Rafale і 4 знішчальнікі Mirage на польскую авіябазу ў Мальбарку. Таксама французскі флот удзельнічае ў патруляванні Балтыйскага мора з базы ў Гдыні.
Каментары