За 4 месяцы 2015 года ў Беларусі зарэгістравалі 309 фактаў фальшываманецтва (летась за такі ж перыяд толькі 265). За незаконныя валютныя аперацыі прыцягнуты да адказнасці 427 чалавек.
У Міністэрстве ўнутраных спраў павелічэнне колькасці фактаў падробкі грошай звязваюць з крызісам снежня 2014 года. Тады людзі масава скуплялі валюту з рук, а не ў банках. Падобная сітуацыя назіралася ў 2011 годзе.
У 167 выпадках падроблівалі амерыканскія даляры, 84 разы — расійскія рублі, 19 — беларускія, 38 — еўра. Адзін раз — кітайскія юані.
Зарэгістраваны выпадак, калі 200 сербскіх дынараў падрабілі пад купюру ў 200 еўра — змянілі выяву.
45 разоў спрабавалі абмяняць «сувенірныя» грошы.
У Ашмянах і Барысаве аператыўнікі канфіскавалі камп’ютарную тэхніку для падробкі беларускіх рублёў.
За фальшываманецтва прадугледжана крымінальная адказнасць — да 15 гадоў калоніі. Сёлета аднаго фальшываманетчыка адправілі за краты па максімуме, другога — на 7 гадоў.
Каментары