У склад Беларускага дзяржаўнага канцэрна па вытворчасці і рэалізацыі тавараў лёгкай прамысловасці ўключанае сумеснае таварыства з абмежаванай адказнасцю «Контэ Спа».
Гэта прадугледжана пастановай Савета міністраў № 536 ад 26 чэрвеня, тэкст якой размешчаны на Нацыянальным прававым інтэрнэт-партале.
Нагадаем, пра тое, што СТАА «Контэ Спа» можа ўвайсці ў склад «Беллегпрама», паведаміў 11 чэрвеня на прэс-канферэнцыі старшыня канцэрна Мікалай Яфімчык. «Кампанія напісала заяву, каб увайсці ў склад канцэрна. Наш савет прагаласаваў за. Зараз чакаем рашэння Савета міністраў аб тым, што СТАА «Контэ Спа» ўвайшло ў склад «Беллегпрама», — сказаў ён.
Паводле слоў Яфімчыка, канцэрн гатовы прыняць у свой склад і іншыя прыватныя кампаніі. «Усё-такі кааперацыя ўнутры канцэрна больш дазволіць ім рухацца. Той жа «Марк Фармель». На іх працуюць больш за палову нашых людзей, яны навучаныя ў нас, раней у нас працавалі, набылі вопыт. Так, там — прыватны бізнес, больш манеўру, больш матывацыі. І гэта цудоўна. Гэта нашы людзі, якія працуюць і на наш рынак, і на экспарт. І тут супярэчнасцяў не павінна быць», — мяркуе кіраўнік канцэрна.
Кампанія «Контэ Спа» (Conte Spa) створаная ў 1997 годзе ў Гродне. Спецыялізуецца на вытворчасці панчошна-шкарпэткавай прадукцыі і трыкатажу для жанчын, мужчын і дзяцей. Актыўна развівае не толькі жаночую гандлёвую марку Conte elegant, але і мужчынскі брэнд DiWaRi, дзіцячы Сonte-kids, а таксама марку ESLI (трыкатажныя вырабы для ўсёй сям'і).
Сёння ў склад канцэрна «Беллегпрам» уваходзяць 95 арганізацый, у тым ліку 78 прамысловых.
Каментары