Старшыня Цэнтральнай камісіі па выбарах і правядзенні рэспубліканскіх рэферэндумаў Лідзія Ярмошына і прадстаўнік кампаніі «Праваабаронцы за свабодныя выбары» Валянцін Стэфановіч 20 ліпеня выступілі ў Вене на канферэнцыі АБСЕ, прысвечанай ацэнцы міжнародных стандартаў і абавязацельстваў для правядзення свабодных, справядлівых і дэмакратычных выбараў.
Як паведаміў Стэфановіч, у сваім выступленні Ярмошына спынілася на імплементацыі рэкамендацый АБСЕ ў выбарчае заканадаўства напярэдадні прэзідэнцкіх выбараў 2010 года. «Новай была інфармацыя пра імплементацыю рэкамендацый па арганізацыі галасавання слабавідушчых. Апрача таго, Ярмошына нагадала, што 11 кастрычніка ў Беларусі пройдуць прэзідэнцкія выбары, на якія ў якасці назіральнікаў запрошаныя прадстаўнікі міжнародных арганізацый», — зазначыў праваабаронца.
Сам Стэфановіч, выступаючы перад прысутнымі, падкрэсліў, што пры адсутнасці палітычнага плюралізму, ва ўмовах абмежавання свабоды асацыяцый і сходаў цяжка гаварыць пра дэмакратычныя выбары ў любой краіне. «Рэкамендацыі АБСЕ — гэта добра, але на практыцы яны не працуюць. Напрыклад, норма аб прадстаўніцтве ў выбарчых камісіях прадстаўнікоў грамадскіх арганізацый. Апазіцыі ў іх як не было, так і няма, паколькі месцы займаюць праўрадавыя БРСМ, «Белая Русь» і іншыя», — сказаў прамоўца.
Паводле яго слоў, праваабаронцы чакаюць ўвасаблення ў жыццё рэкамендацый, якія дазвалялі б зрабіць празрыстымі падлік галасоў.
Канферэнцыю вёў дырэктар Бюро па дэмакратычных інстытутах і правах чалавека АБСЕ Міхаэль Георг Лінк. Сярод запрошаных былі члены цэнтральных выбарчых камісій, парламентарыі, эксперты ў сферы выбарчага права і нацыянальныя назіральнікі з краін — удзельніц Арганізацыі па бяспецы і супрацоўніцтве ў Еўропе. Адным са спікераў быў кіраўнік ЦВК Расіі Уладзімір Чураў, які, паводле слоў Стэфановіча, паводзіў сябе агрэсіўна, у прыватнасці, «пастаянна патрабаваў» правяраць крыніцы фінансавання НДА і падкрэсліваў, што БДІПЧ АБСЕ не павінна ўказваць краінам, як праводзіць выбары.
Каментары