Магістранты ЕГУ атрымалі Дзяржаўныя стыпендыі Літоўскай Рэспублікі
Пяць выпускнікоў бакалаўрыяту Еўрапейскага гуманітарнага ўніверсітэта (ЕГУ) атрымалі прэстыжную Дзяржаўную стыпендыю на навучанне ў магістратуры. Пра гэта паведаміла Міністэрства асветы і навукі Літвы ў жніўні.
Міністэрства штогод прапануе грамадзянам краін Усходняга партнёрства і Цэнтральнай Азіі паўдзельнічаць у конкурсе на атрыманне фінансавай падтрымкі для навучання ў магістратуры.
«Стыпендыя ад Літоўскага ўрада, якую я атрымала, вырашае абсалютна ўсе фінансавыя пытанні, звязаныя з магістратурай: грант пакрывае кошт навучання, выплачваецца штомесячная стыпендыя. Я вельмі радая, што існуюць падобныя праграмы, якія дапамагаюць матываваным студэнтам з Беларусі дасягаць сваіх мэтаў. Мне вельмі прыемна, што сярод стыпендыятаў Літоўскага ўрада, акрамя мяне, ёсць яшчэ і іншыя студэнты ЕГУ: на маю думку, гэта сведчыць пра добры ўзровень адукацыі нашых выпускнікоў», – цешыцца Яна Ляшковіч, студэнтка магістарскай праграмы ЕГУ «Гістарычная і культурная спадчына».
Конкурс па прадастаўленні Дзяржаўных стыпендый мае на мэце прыцягненне грамадзян краін Усходняга партнёрства і Цэнтральнай Азіі для навучання на магістарскіх праграмах ва ўніверсітэтах Літвы. Заяўкі адбіраюцца паводле крытэрыяў акадэмічнай паспяховасці, навуковых і творчых дасягненняў, валодання англійскай мовай, а таксама матывацыі будучых магістрантаў.
«Атрыманне гранта са стыпендыяй – гэта вялікі гонар, таму што такі конкурс дазваляе па-сапраўднаму, аб'ектыўна ацаніць свае здольнасці і добрыя якасці, зразумець, чаго ты насамрэч варты. Для мяне гэтая стыпендыя таксама вырашыла сур'ёзнае пытанне пра сумяшчэнне навучання і працы. Як мне здаецца, які б таленавіты і працаздольны ты ні быў, можна альбо выдатна вучыцца, альбо добра зарабляць. Спадзяюся, што магістратура ў ЕГУ дапаможа мне аб'яднаць мае ранейшыя навыкі і інтарэсы, і зараз дзякуючы стыпендыі я змагу засяродзіцца на паглыбленні сваіх акадэмічных ведаў, на творчасці, змагу нават дазволіць сабе нечуваную раскошу для нядаўняга выпускніка: абіраць тую працу, якая мне цікавая», – кажа Ксенія Шталенкова, студэнтка магістарскай праграмы ЕГУ «Культурныя даследаванні».
Сёлета лаўрэатамі Дзяржаўнай стыпендыі, якая цалкам пакрывае кошт навучання ў магістратуры, а таксама дае штомесячную стыпендыю на час навучання, сталі 5 выпускнікоў бакалаўрскіх праграм ЕГУ 2015:
- Андрэй Вайтовіч, студэнт магістарскай праграмы ЕГУ «Публічная палітыка»;
- Яна Ляшковіч, студэнтка магістарскай праграмы ЕГУ «Гістарычная і культурная спадчына»;
- Лізавета Новікава, студэнтка праграмы ЕГУ «Міжнароднае права і права Еўрапейскага саюза»;
- Ксенія Шталенкова, студэнтка праграмы ЕГУ «Культурныя даследаванні»;
- Аляксей Масцяпанаў, студэнт Юрыдычнага факультэта Віленскага ўніверсітэта.
Каментары