Еўрапейскі банк рэканструкцыі і развіцця прыняў рашэнне аб выдзяленні Украіне 300 мільёнаў даляраў на запампоўку газу ў сховішчы для таго, каб краіна змагла спакойна перажыць асенне-зімовы сезон.
«Крэдыт будзе садзейнічаць умацаванню энергетычнай бяспекі Украіны шляхам дыверсіфікацыі пастаўшчыкоў прыроднага газу і маршрутаў дастаўкі», — гаворыцца ў паведамленні банка.
На думку дырэктара ЕБРР па энергетыцы і прыродных рэсурсаў Рыкарда Пуліці, фінансавая дапамога закліканая стымуляваць рэформы ў газавым сектары Украіны, часткай якіх павінна стаць вялікая празрыстасць і эфектыўнасць працы ўкраінскага «Нафтагаза».
Раней прэм'ер-міністр Украіны Арсеній Яцанюк паведаміў, што на рахунках «Нафтагаза» ужо ёсць 500 млн даляраў на запампоўку расійскага газу ў падземныя сховішчы.
«500 мільёнаў даляраў ЗША ўжо цяпер знаходзяцца на банкаўскім рахунку НАК «Нафтагаз», і мы гатовыя да таго, каб запампаваць гэты газ. […] Мы разлічваем, што Савет дырэктараў ЕБРР прыме рашэнне аб выдзяленні Украіне дадаткова 300 мільёнаў даляраў ЗША на тое, каб закупіць газ для патрэб украінскай эканомікі на заходняй мяжы. Калі такое рашэнне будзе ўхваленае, «Нафтагаз» па працэдурах ЕБРР правядзе тэндэр, каб на 300 мільёнаў даляраў набыць газ — менавіта на заходняй мяжы», — казаў Яцанюк.
25 верасня Расія, Украіна і Еўрапейскі саюз парафіравалі пагадненне, якое павінна забяспечыць пастаўкі расійскага газу ва Украіну ў зімовы перыяд.
Цяпер чытаюць
У сям'і Міронцавых за палітыку ўжо асудзілі маці і трох сясцёр. А цяпер арыштавалі і мужа адной з сясцёр3
Каментары