У Маскве затрыманая дырэктарка Бібліятэкі ўкраінскай літаратуры. Яе абвінавачваюць ва «ўзбуджэнні нацыянальнай нянавісці» за наяўнасць у бібліятэцы «газет, якія могуць насіць русафобскі характар» і «экстрэміскай літаратуры», паведамілі ў чацвер расійскія СМІ.
МЗС Украіны выказаў пратэст у сувязі з ператрусамі ў бібліятэцы ў Маскве.
Супраць 58-гадовай дырэктаркі Наталлі Шарынай заведзеная справа па п.»Б» ч.2 арт.282 КК РФ (узбуджэнне нацыянальнай нянавісці і варожасці, а роўна зневажэнне чалавечай годнасці).
Ад 2014 года ў Расіі ідзе масавая антыўкраінская кампанія. СМІ і інтэрнэт-сайты масава называюць украінцаў «бандэраўцамі», а саму Украіну — няўдалай дзяржавай. Украіну абвінавачваюць у парушэнні правоў рускіх. Пры гэтым у самой Расіі няма ніводнай школы на ўкраінскай мове навучання, у кабельных сетках Расіі недаступны ніводзін тэлеканал на ўкраінскай мове. Маскоўская бібліятэка была адным з нешматлікіх цэнтраў украінскай культуры ў РФ.
У чацвер расійскія СМІ паведамілі, што гаворка можа ісці пра наяўнасць у бібліятэцы кнігі Дмытра Карчынскага, прызнанай у Расіі экстрэмісцкай.
Каментары