З 10 лядовых арэнаў змяшчальнасцю больш за 500 гледачоў акупляюцца толькі дзве
Газета «Прессбол» правяла даследаванне на прадмет таго, як акупляюцца лядовыя палацы ўмяшчальнасцю больш за 500 гледачоў у гарадах, дзе няма хакейных каманд.
Такіх арэн па ўсёй Беларусі выйшла дзесяць. Акупнымі з'яўляюцца ўсяго дзве: мінскі палац на Прытыцкага (умяшчальнасць 1823 гледачы), а таксама палац у Пінску (640).
Сем арэн з'яўляюцца стратнымі. Найменшы працэнт акупнасці ў арэны ў Лунінцы (12%; 790 гледачоў). Далей ідуць арэны ў Горках (15—20%; 560 гледачоў), Івацэвічах (21%; 790 гледачоў), Кобрыне (28%; 790 гледачоў), Пружанах (36%; 790 гледачоў), Баранавічах (42%; 2100 гледачоў), Оршы (66%; 3500 гледачоў).
Яшчэ адна арэна (у Бярозе умяшчальнасцю 570 гледачоў) не падае дадзеныя ў Брэсцкі аблвыканкам, бо «носіць аўтаномны характар і функцыянуе пад патранажам кампаніі «Трайпл».
За 10 месяцаў 2015 арэна ў Івацэвічах здолела зарабіць 1,5 мільярда рублёў. Пры акупнасці ў 21% атрымліваецца, што выдаткі на ўтрыманне палаца ў год складаюць больш за 7 мільярдаў рублёў (каля 400 тысяч даляраў па бягучым курсе Нацыянальнага банка).
Больш за ўсё такіх лядовых палацаў пабудавана ў Брэсцкай вобласці — сем. Экс-начальнік упраўлення спорту і турызму Брэсцкага аблвыканкама Мікалай Хевук у 2012 годзе заявіў наступнае: «Усе гэтыя аб'екты ў галіне стратныя. Дзякуй Богу, будаўніцтва новых арэн не плануецца. Гэта на сёння галаўны боль. Мы набудавалі палацаў, а цяпер разважаем, як іх утрымліваць. Думалі, заробім грошы, але ў выніку не атрымалася».
Усяго ў Беларусі 30 лядовых палацаў. Таксама Аляксандр Лукашэнка даручыў пачаць будаўніцтва арэны для Начной хакейнай лігі.
Каментары