Хто «зліў» расійскім чарнасоценцам інфармацыю пра беларускага журналіста Івашына?
На адным з расійскіх чарнасоценскіх сайтаў нядаўна з’явіўся матэрыял, у якім аўтары разгалошваюць прыватныя звесткі пра аўтара ўкраінска-беларускага рэсурсу «InformNapalm», гродзенца Дзяніса Івашына.
Таксама чарнасоценцы апублікавалі хатнія адрасы Дзяніса, нумары машын, якія яму належаць (як прадпрымальніку) і нават год шлюбу ягонай маці!
Чарнасоценцы заяўляюць, што скарысталіся івашынскай жа тактыкай і «нарылі» у адкрытых крыніцах масу інфармацыі пра Дзяніса.
Але ж звесткі пра нумары машын, поўнае імя ягонага айчыма і год шлюбу маці нельга адшукаць, не маючы доступу да адмысловых базаў.
Іначай кажучы, хтосьці «зліў» чарнасоценцам прыватную інфармацыю пра чалавека.
«Самае паскуднае ў гэтым пасквілі тое, што чапаюць маіх бацькоў, — сказаў Дзяніс Івашын «Нашай Ніве», — асабліва казкі пра тое, што мой бацька з’ехаў ад нас з маці ў Маскву. Мой бацька памёр некалькі гадоў таму!»
(Аўтары сцвярджаюць, што бацька беларуса «не вытрымаў «свядамізму» сына і жонкі і з’ехаў ад іх у Маскву.)
Іншыя дэталі: у апісанні бізнэсу Івашына (той здае ў арэнду машыны) чарнасоценцы спасылаюцца на негатыўныя каментары да якасці абслугоўвання, якія з’явіліся на розных сайтах яшчэ два месяцы таму, пры гэтым — у адзін дзень. Напісаныя яны ў адным стылі.
«Гэты пасквіль чарговага разу давёў, з кім мы маем дачыненне — з цынічным і падступным ворагам, які праз методы шальмавання, ачарнення спрабуе дыскрэдытаваць свайго супраціўніка», — кажа Дзяніс.
«Бліжэйшымі днямі я вырашу, ці варта пісаць у пракуратуру просьбу праверыць, якім чынам аўтары атрымалі доступ да закрытай інфармацыі», — дадае таксама Дзяніс.
Разам з гэтым юрыст-вясновец Павел Сапелка патлумачыў «Нашай Ніве», што асабістыя звесткі кшталту прозвішчаў і нумароў аўто не складаюць з сябе таямніцу і не ахоўваюцца. Але, калі іх няма ў адкрытым доступе і гэтыя звесткі атрыманыя ад службовай асобы, то гэта ўжо службовае правапарушэнне.
«Забароненыя і цягнуць крымінальную адказнасць незаконныя збіранне альбо распаўсюджванне звестак аб прыватным жыцці, якія складаюць асабістую ці сямейную таямніцу іншай асобы, без яго згоды, і якія пацягнулі прычыненне шкоды правам, свабодам і законным інтарэсам пацярпелага», — дадаў таксама Павал Сапелка.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй40
Каментары