Call of Jihad: Ісламісты выкарыстоўваюць відэагульні пры вярбоўцы баевікоў
Баевікі «Ісламскай дзяржавы» пашыраюць сваю прапаганду ў інтэрнеце перш за ўсё праз відэаролікі, і вельмі часта — праз выкарыстанне знаёмых моладзі вобразаў з камп’ютарных гульняў.
Пра гэта напісаў навуковую працу даследчык Універсітэта Джорджа Вашынгтона Хаўер Лесака, які прааналізаваў 845 відэа, што ІДзІЛ распаўсюджвала з пачатку 2014 па верасень 2015 года.
Аказалася, што 15% з іх пабудаваныя на вобразах і метадах з заходніх кінафільмаў і гульняў.
Фактычна ісламісты выкарыстоўваюць маркетынг і лічбавыя камунікацыі не толькі каб пашыраць свае ідэі і тлумачыць свае ўчынкі, але і для таго, каб зрабіць сам тэрор як метад папулярным, пажаданым і «крутым» у вачах моладзі.
Такім жа чынам «крутасць» дазваляе адключыць у падлеткаў думкі пра маральнасць ці амаральнасць учынкаў.
«ІДзІЛ выкарыстоўвае ўнікальную і складаную аўдыёвізуальную стратэгію, якая глыбока ўбудаваная і эфектыўна дзейнічае ў культуры мэтавых аўдыторый», — піша Хаўер Лесака.
У роліках часта сустракаецца музыка і відэашэраг з папулярных фільмаў і гульняў — такіх як «V значыць вендэта», «Амерыканскі снайпер», Сall of Duty, Mortal Combat X і Gran Theft Auto.
Таксама ІДзІЛ выкарыстоўвае розныя групы для працы з мэтавымі аўдыторыямі з розных краін і розныя мовы. Гэтак са 120 ролікаў, якія не прызначаліся для арабамоўных і цюркамоўных аўдыторый, 27% зробленыя на ангельскай мове, 15% на расейскай, 13% на французскай і 3% на нямецкай.
Упершыню ў сучаснай гісторыі тэрарыстычная групоўка звяртаецца наўпрост да эмоцый і амбіцый моладзі, амаль кожны дзень ствараючы новы ролік на роднай мове гэтай аўдыторыі і з выкарыстаннем знаёмых для яе вобразаў, піша даследчык.
Каментары