Падзенне беларускай эканомікі ў найбліжэйшыя месяцы замарудзіцца, рэцэсія паводле вынікаў 2016 года складзе прыкладна 1%. Такі прагноз прыводзіцца ў сакавіцкім эканамічным аглядзе, які падрыхтавалі эксперты цэнтра сацыяльна-эканамічных даследаванняў CASE Belarus.
На думку эканамістаў, зніжэнне ВУП Беларусі на 4% у студзені—лютым абумоўленае высокай статыстычнай базай мінулага года. У наступныя месяцы, прагназуюць яны, глыбіня эканамічнага спаду ў Беларусі пачне скарачацца. «У сакавіку будзе ўжо ў раёне мінус 2%, а ў красавіку — у раёне мінус 1,2%, і далей так будзе да канца года. Паводле вынікаў года будзе ў раёне мінус 1%», — лічаць аўтары агляду.
Пры гэтым яны мяркуюць, што запаволенне падзення тэмпаў ВУП ўрад растлумачыць паляпшэннем сітуацыі, «сваёй добрай працай». «Будуць заявы, што крызіс ужо праходзіць», — адзначаюць эксперты. «Але ў рэчаіснасці проста пакуль эканоміка адаптавалася да новых цэнавых умоў, і калі новых умоў не наступіць, то яна будзе знаходзіцца на адным узроўні, калі скончыцца эфект (статыстычнай) базы, а скончыцца ён у красавіку», — адзначаецца ў аглядзе.
На думку аналітыкаў, цяперашняя рэцэсія абумоўленая структурнай слабасцю эканомікі. «Для пераадолення структурнай рэцэсіі трэба праводзіць структурныя (інстытуцыйныя) рэформы, першымі этапамі якіх павінны ісці лібералізацыя і макраэканамічная стабілізацыя, што патрабуюць правядзення жорсткай грашова-крэдытнай палітыкі», — лічаць аўтары даследавання.
У той жа час, дадаюць яны, для пераадолення цыклічнай рэцэсіі трэба стымуляваць унутраны попыт за кошт змякчэння грашова-крэдытнай палітыкі.
«Магчыма, больш мэтазгодна пачаць з правядзення структурных рэформаў, устараніўшы у першую чаргу адміністрацыйныя механізмы неэфектыўнага размеркавання абмежаваных рэсурсаў, і ўжо затым вярнуцца да палітыкі змякчэння, маючы упэўненасць у тым, што гэтым разам рэсурсы дастануцца тым, хто здолее забяспечыць іх эфектыўнае выкарыстанне», — лічаць эксперты цэнтра CASE Belarus.
Нагадаем, афіцыйны прагноз на 2016 год прадугледжвае рост ВУП на 0,3%.
Цяпер чытаюць
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары