Прэс-сакратар прэзідэнта Расіі Дзмітрый Пяскоў адмаўляе інфармацыю, якая змяшчаецца ў «панамскіх дакументах», пра тое, што яго жонка, алімпійская чэмпіёнка Таццяна Наўка, валодае афшорнымі кампаніямі.
«Указваецца, што ў маёй жонкі з 2014 па 2015 гады быў афшор, афшорная кампанія. Справа ў тым, што ў маёй жонкі ніколі не было і няма афшорных кампаній. Яна ніколі іх не адкрывала і, адпаведна, не магла закрываць», — заявіў пяскоў.
Пры гэтым ён не стаў адказваць на пытанне журналістаў пра тое, калі менавіта ён зарэгістраваў шлюб з Таццянай Наўкай, назваўшы гэта сваёй асабістай справай.
Па законе блізкім сваякам высокапастаўленых расійскіх чыноўнікаў забаронена карыстацца замежнымі фінансавымі інструментамі і валодаць рахункамі за мяжой.
Сама Таццяна Наўка таксама заявіла «Новай газеце», што ніколі не валодала ніякімі замежнымі кампаніямі або рахункамі. На пытанне выдання, ці мог нехта скарыстацца яе дакументамі без яе ведама, яна сказала: «Я не ведаю, хто гэта мог зрабіць. Ды мне б і самой хацелася ў гэтым разабрацца».
Таксама Пяскоў заявіў, што ў Крамлі пакуль не бачаць сэнсу падаваць судовыя пазовы ў сувязі з публікацыяй дакументаў Mossack Fonseca. Паводле яго слоў, цяперашняе расследаванне не ўяўляе сабой нічога канкрэтнага або новага асабіста пра прэзідэнта Пуціна. «Пакуль гэта спекуляцыі», — сказаў Пяскоў.
У распараджэнні найбуйнейшых сусветных СМІ раней з'явіліся мільёны дакументаў, у якіх паказваецца, што кампанія Mossack Fonseca у шэрагу выпадкаў дапамагала кліентам адмываць грошы, пазбягаць санкцый і сыходзіць ад падаткаў.
У дакументах змяшчаюцца дадзеныя пра сакрэтныя афшорныя кампаніі, звязаныя з сем'ямі і паплечнікамі шэрагу сусветных лідараў, у тым ліку прэзідэнта Расіі Уладзіміра Пуціна.
Цяпер чытаюць
Музыка Цім Суладзэ: Розніца 30 гадоў — тое, што адпавядае маім уяўленням пра адносіны23
Каментары