«Калі беларускія ўлады выканаюць нашы дамоўленасці, выпусцяць Казуліна і двух новых палітзняволеных, а таксама палепшаць сітуацыю з правамі чалавека, напрыклад дазволяць правядзенне мірных дэманстрацый, мы пачнем з Беларуссю дыялог аб адмене санкцый», — заявіў у інтэрв'ю БелаПАН памочнік дзяржаўнага сакратара ЗША па пытаннях Еўропы і Еўразіі Дэвід Меркел.
Паводле яго слоў, у студзені 2008 года бакамі была дасягнута дамоўленасць аб тым, што ўмовай для неўступлення ў сілу санкцый у дачыненні да канцэрна «Белнафтахім» і пачатку дыялогу аб адмене санкцый з'яўляецца вызваленне ўсіх палітзняволеных і паляпшэнне сітуацыі з правамі чалавека.
Д. Меркел зазначыў, што Мінск спрабуе перавесці пытанне ў іншую плоскасць: у абмен на адмену ЗША санкцый амерыканскай дыпмісіі дазволяць працягваць працаваць у Беларусі. «Але гэта два розныя пытанні: санкцыі цесна звязаны з правамі чалавека і вызваленнем палітычных зняволеных», — заявіў памочнік дзяржаўнага сакратара ЗША.
Д. Меркел пацвердзіў, што амерыканскі бок «зацікаўлены ў вырашэнні канфлікту». «Беларускія ўлады ведаюць, што яны пагадзіліся зрабіць і што ім варта зрабіць, каб гэты канфлікт вырашыць. Гэтая дамоўленасць — аснова нашых трохбаковых кансультацый паміж ЕС, ЗША і Беларуссю», — заявіў прадстаўнік Дзярждэпа ЗША.
У дачыненні да працы пасольства ЗША ў Мінску і дыппрадстаўніцтва Беларусі ў ЗША Д.Меркел указаў, што сёння «разглядаюцца ўсе магчымыя варыянты далейшых дзеянняў».
Абвастрэнне беларуска-амерыканскіх адносінаў пачалося ў сакавіку пасля апублікавання на афіцыйным сайце Мінфіна ЗША тлумачэнняў да санкцый, уведзеных у лістападзе 2007 года ў дачыненні да канцэрна «Белнафтахім». 7 сакавіка з Вашынгтона для кансультацый быў адкліканы пасол Беларусі ў ЗША Міхаіл Хвастоў. 12 сакавіка па патрабаванні беларускага боку Мінск пакінула пасол ЗША Карэн Сцюарт. Затым амерыканскаму боку было рэкамендавана скараціць колькасць супрацоўнікаў дыпмісіі. 27 сакавіка Мінск пакінулі 17 амерыканскіх дыпламатаў, працаваць працягвалі 15 супрацоўнікаў. Яшчэ 11 амерыканскіх дыпламатаў пакінулі Мінск па патрабаванні беларускага боку 3 мая.
Цяпер чытаюць
У турме памёр былы супрацоўнік КДБ Мікалай Варапай, асуджаны за шпіянаж на карысць Украіны2
Каментары