Асноўныя падзеі Дня горада пройдуць каля Палаца спорту і ў Верхнім горадзе
Асноўныя падзеі святкавання 949-годдзя Мінска пройдуць 3 верасня і будуць сканцэнтраваныя на пляцоўцы каля Палаца спорту і ў Верхнім горадзе, паведаміла на прэс-канферэнцыі 24 жніўня першы намеснік начальніка галоўнага ўпраўлення ідэалагічнай работы, культуры і па справах моладзі Мінгарвыканкама Віталіна Рудзікава.
У 11 гадзін адбудзецца ўрачыстая цырымонія ўскладання кветак ад кіраўніцтва горада і мінчан да абеліска «Мінск — горад-герой» на плошчы Перамогі. Тут жа будзе дзяжурыць Ганаровая вахта памяці.
Традыцыйная ўрачыстая цырымонія шлюбу дзевяці пар з усіх раёнаў горада пачнецца ў канцэртнай зале «Верхні горад» у 12.00. У гэты ж час каля Палаца спорту адкрыецца святочная праграма «Мой Мінск, у сэрцы ты адзіны!» з удзелам творчых калектываў і майстроў мастацтваў Беларусі. Будзе працаваць выстава-кірмаш майстроў народнай творчасці «Горад майстроў», пройдуць майстар-класы па прыгатаванні страў беларускай кухні, на сцэне выступяць сталічныя кавер-бэнды.
У другой палове дня музычную праграму «Класіка любімаму гораду» прадставіць Дзяржаўны сімфанічны аркестр пад кіраўніцтвам Аляксандра Анісімава. Таксама на свяце выступяць зоркі беларускай эстрады, у тым ліку Дзмітрый Калдун, група «Дразды» і іншыя.
Увечары ў тэатры оперы і балета ўзнагародзяць пераможцаў конкурсу «Мінчанін года», затым адбудзецца канцэрт артыстаў беларускай оперы.
Завершыцца дзень музычна-піратэхнічным феерверк-шоу (пачатак у 22.00).
Таксама ў дні святкавання 949-годдзя Мінска з 1 па 12 верасня па ўсім горадзе пройдзе шэраг выставачных праектаў, спартыўных спаборніцтваў, фестываляў, турніраў, дабрачынных акцый, раённых мерапрыемстваў.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі73
Каментары