Кандыдат у дэпутаты, экс-кандыдат у прэзідэнты, адзін з лідараў кампаніі «Гавары праўду» Таццяна Караткевіч прагаласавала на парламенцкіх выбарах за саму сябе. Пра гэта яна паведаміла журналістам пасля галасавання 11 верасня.
Караткевіч прыйшла на выбарчы ўчастак з мужам, сынам і суседкай. Іх таксама суправаджаў адзін з лідараў кампаніі «Гавары праўду» Андрэй Дзмітрыеў.
Караткевіч упэўненая, што яе голас «далучыўся да большасці людзей, якія хочуць пераменаў». На пытанне, як яна ацэньвае свае шанцы на выбарах, палітык адказала: «Сёння гэта ўжо ўсё адно. Столькі працы зроблена штодзённай — гэта сустрэчы з выбаршчыкамі, размовы, перакананні, дыскусіі. Сёння важна, каб палічылі правільна і каб перамаглі людзі, якія аддалі свой голас за мірныя перамены».
Караткевіч падкрэсліла, што спадзяецца на правільны падлік галасоў на выбарах. «Я не бачу сэнсу лічыць па-іншаму», — дадала яна.
Незалежна ад вынікаў выбараў Таццяна Караткевіч мае намер працягваць палітычную дзейнасць, адстойваць сваю праграму, «дапамагаць выбаршчыкам рабіць так, каб палітыка была сапраўдным механізмам вырашэння праблем і прыняцця рашэнняў па ўсёй краіне».
Разам з Караткевіч па Кастрычніцкай выбарчай акрузе № 97 балатуюцца начальнік станцыі Мінск-Пасажырскі УП «Мінскае аддзяленне Беларускай чыгункі» Аляксандр Дрожджа, член Аб'яднанай грамадзянскай партыі, дырэктар ТАА «Грынрэй» Ганна Канапацкая, дырэктар прыватнага гандлёва-вытворчага ўнітарнага прадпрыемства «Саціўс», сябра Беларускай патрыятычнай партыі Валерый Клінцоў, інжынер-тэхнолаг ТАА «Інтэграл», сябра Беларускай партыі левых «Справядлівы свет» Яўген Макараў, а таксама намеснік галоўнага інжынера - начальнік аддзела аховы працы і навакольнага асяроддзя ААТ «Мінскі завод грамадзянскай авіяцыі 407» Канстанцін Монтач.
Каментары