Паведамляецца, што з учарашняга дня дамены WhatsApp, YouTube, Facebook і шэрагу іншых сэрвісаў, забароненых у Расіі, сталі недаступныя для карыстальнікаў у краіне.
Гаворка ідзе ўжо не пра запавольванне працы, а пра поўную «нябачнасць» гэтых рэсурсаў: іх адрасы выдаленыя з нацыянальнай сістэмы DNS. У выніку пры спробе зайсці на сайт немагчыма вызначыць яго IP-адрас, і сістэма паведамляе пра неіснуючы дамен. Такім чынам, доступ да такіх сайтаў фактычна цалкам спынены.
Акрамя названых платформаў, недаступнымі сталі таксама дамены BBC, Deutsche Welle, «Радыё Свабода», ананімнага браўзера Tor, сацсеткі Instagram і іншых рэсурсаў.
Выкарыстанне расійскімі правайдарамі Нацыянальнай сістэмы даменных імёнаў, якой кіруе Раскамнагляд, прадугледжана законам аб «суверэнным інтэрнэце». Ужыванне альтэрнатыўных DNS-сэрвісаў (напрыклад, Google DNS) улады паслядоўна абмяжоўваюць з 2021 года.
Каментары
Voś i dziejničajuć na apieradžennie, kab nie paŭtaryć pamyłak Ajataly, u Iranie abrubili internet, kali pratesty ŭžo pašyrylisia na ŭsiu krainu.
Plus prapahanda tam całkam skamprametavała siabie ŭ vačach navat samych viernych jejnych baranóŭ, pačynaje raści cikavaść da zachodnich hałasoŭ...
Heta i na Bełaruś raspaŭsiudziać...