Прэзэнтацыя аўдыёвыданьня прайшла 12 чэрвеня ў музэі гісторыі беларускай літаратуры.
Яна прысвечана 115‑годдзю Максіма Гарэцкага.
Як паведаміў акцёр і рэжысёр беларускага радыё Алег Вінярскі, які запісаў дыск, гэта аўдыёкніга — першая інтэрпрэтаваная праз радыёмастацтва праца Гарэцкага. Дыск створаны паводле твора, нататкі для якога пісьменнік напісаў у часе Першай імперыялістычнай вайны на фронце, «пад выбухі снарадаў». Гэтыя дакументальна‑мастацкія запіскі былі выдадзены ў 1926‑м і перавыдадзены ў 1987 годзе.
«У сваім творы Гарэцкі перадаў характар чалавека, які папаў на вайну. Для мяне было самым значным, што Гарэцкі прыходзіць у гэтую атмасферу, дзе амаль што ўсе рускія людзі, і застаецца там беларусам», — адзначыў А.Вінярскі.
Паводле яго слоў, «гэты чалавек увасабляе сабой якраз той тып беларуса, якога мы ўсе прагнем». «Па‑першае, гэта адкрытасць, шчырасць, па‑другое, праўдзівасць, таму што ён не мог схлусіць, і трэцяя рыса — гэта спачуванне і міласэрнасць да чалавека», — сказаў А.Вінярскі. «Варта заўважыць, як ён ставіцца да людзей іншых рэлігій і нацыянальнасцей: яўрэяў, палякаў. Яшчэ адна рыса, якая мне падалася, — гэта крытычнасць», — дадаў ён.
«Імперыялістычная вайна — адна з хваляў жыцця Гарэцкага», — адзначыў пляменнік пісьменніка, вядомы навукоўца і грамадскі дзеяч акадэмік Радзім Гарэцкі.
Паводле яго слоў, «Запіскі на імперыялістычнай вайне» паклалі пачатак шэрагу твораў беларускай прозы антываеннага кірунку, які затым працягнуў Васіль Быкаў.
Як адзначыў літаратуразнаўца, даследчык творчасці М.Гарэцкага член‑карэспандэнт НАН Беларусі Міхась Мушынскі, радыёінтэрпрэтацыя твора «Запіскі на імперыялістычнай вайне» — гэта неабходная пашана дзейнасці выдатнага дзеяча беларускай культуры.
Юрась Зянковіч расказаў пра сваё вызваленне і шлях у ЗША6
Каментары