Абследаванне паказала, што брама знаходзіцца ў жаласным стане, піша «Рэспублiка».
Па словах дырэктара мемарыяльнага комплексу «Брэсцкая крэпасць-герой» Рыгора Бысюка, адна з славутасцяў цытадэлі стала небяспечнай для наведвальнікаў:
— Са столевага скляпення пачалі падаць цагліны. Спачатку адна, затым другая. Зразумела, гэта магло прывесці да трагедыі. Таму і было прынята рашэнне закрыць праход праз Тэрэспальскую браму да завяршэння рэстаўрацыйных работ.
Спецыялісты вывучылі стан збудавання, які перажыў дзве вайны. Вынік несуцяшальны — з цягам часу пачалі выяўляцца наступствы артабстрэлаў і бамбёжак. Асабліва моцна вароты пацярпелі ў першыя дні Вялікай Айчыннай, апынуўшыся ў цэнтры лютых баёў. Верхняя частка будынка была амаль знішчана. Яе разабралі ў жніўні 1941 года, напярэдадні прыезду ў Брэсцкую крэпасць Гітлера і Мусаліні.
Па словах архітэктара-рэстаўратара Уладзіміра Казакова, на аб'екце трэба будзе правесці складаны і дарагі комплекс рэстаўрацыйных работ.
Калі Тэрэспальская брама зноў будзе адкрыта для наведвальнікаў, пакуль невядома.
Каментары