Супрацоўнікі ФСБ РФ затрымалі меркаванага стваральніка сайта «Шалтай-балтай» Уладзіміра Анікеева яшчэ ў кастрычніку 2016 года, а ў суботу, 28 студзеня, пра гэта паведаміла агенцтва «Росбалт» са спасылкай на ўласную крыніцу. Анікееў быў узяты пад варту ў Санкт-Пецярбургу, куды ён прыляцеў з Украіны.
Групоўка стала вядомая пасля публікацыі перапіскі высокапастаўленых чыноўнікаў, у тым ліку прэм'ер-міністра Дзмітрыя Мядзведзева і віцэ-прэм'ера Аркадзя Дварковіча, адзначае DW.
Як піша «Росбалт», Анікеева «выманілі» з Украіны, адкуль ён «вяртацца не збіраўся». ФСБ выставіла яму абвінавачванне па артыкуле 272 КК РФ (Неправамерны доступ да камп'ютарнай інфармацыі).
Акрамя таго, напярэдадні паведамлялася пра затрыманне яшчэ аднаго ўдзельніка групоўкі «Шалтай-балтай». Паводле выдання, ім аказаўся супрацоўнік цэнтра інфармацыйнай бяспекі (ЦІБ) ФСБ Дзмітрый Дакучаеў. Ён быў узяты пад варту ў снежні 2016 года. Разам з ім быў затрыманы таксама адзін з кіраўнікоў ЦІБ Сяргей Міхайлаў і топ-менеджар «Лабараторыі Касперскага» Руслан Стаянаў.
Паводле СМІ, менавіта Міхайлаў і быў куратарам групоўкі «Шалтай-балтай» у апошнія месяцы, а Дакучаеў з'яўляўся непасрэдным выканаўцам узломаў.
Цяпер яны праходзяць па справе аб дзяржаўнай здрадзе.
Цяпер чытаюць
Беларусам стала складаней легалізавацца ў Польшчы — там больш не прымаюць выдадзеныя ў БССР дакументы і патрабуюць апастылі29
Каментары