Палітыкі і аналітыкі ў Вашынгтоне згулялі ў абарону Балтыі ад Расіі
У Бібліятэцы Кангрэса ЗША ў Вашынгтоне адбылася стратэгічная гульня, сцэнарам якой была абарона краін Балтыі ад атакі з боку Расіі, напісаў у сваім Facebook кіраўнік камісіі па замежных справах парламента Эстоніі Марка Міхельсан (Marko Mihkelson).
У гульні, якая адбылася на рэальнай мапе, дзе фішкамі адзначаліся сілы НАТА і Расіі, удзельнічалі аналітыкі даследчай карпарацыі RAND, а таксама дзеючыя сябры Кангрэса ЗША ад Рэспубліканскай і Дэмакратычнай партый.
Удзельнікі змаглі ацаніць узровень падрыхтаванасці войскаў Эстоніі, Літвы і Латвіі, а таксама іншых краін НАТА да супольнай абароны. Разглядалася пытанне пра ўзровень жадання хаўруснікаў краін Балтыі дапамагаць ім у абароне, а таксама тэрмінаў рэакцыі на пагрозу.
Пасля вяртання ў Эстонію парламентарый падзяліўся ўражаннямі адносна будучай палітыкі ЗША пры Трампе.
«Адысці ад санкцый немагчыма, пакуль не з'явіцца пазітыўная дынаміка ва ўсходняй Украіне. Пытанне санкцый яшчэ адкрытае — зараз Трамп адмяняць іх не будзе», — сказаў Міхельсан.
Летам 2016 года камандуючы ўзброенымі сіламі ЗША ў Еўропе генерал-лейтэнант Бен Ходжэс заявіў, што ў сучасных умовах НАТА не зможа абараніць краіны Балтыі ў выпадку напада з боку Масквы.
Восенню 2016 года эксперты RAND апублікавалі вынікі сваіх стратэгічных гульняў, згодна з якімі НАТА проста не паспее перакінуць у краіны Балтыі дастаткова войск — Расія, маючы шматкротную перавагу ў сілах, паспее захапіць Эстонію, Латвію і Літву за 3-4 дні. З гэтай прычыны RAND рэкамендаваў накіраваць у рэгіён дадатковыя сілы альянса.
У канцы 2016-пачатку 2017 года ЗША пачалі перакідваць ва Усходнюю Еўропу сваю бранятанкавую брыгаду.
Каментары