Аднаго з лідараў «Маршаў недармаедаў» на Берасьцейшчыне Аляксандра Кабанава будуць судзіць у Бярозе, а ў Брэсцеі адбудзецца працэс над удзельнікам маршу Андрэем Марачам.
Аляксандра Кабанава будуць судзіць другі раз. Ён ужо адбыў 5 сутак арышту паводле абвінавачання ў хуліганстве і брыдкаслоўі. Сам спадар Кабанаў тады віны не прызнаў, ён кажа, што сапраўдная прычына — ягоны актыўны ўдзел у арганізацыі «Маршаў недармаедаў» у розных гарадах вобласці.
Цяпер Аляксандра Кабанава будуць судзіць за ўдзел у несанкцыянаваным «Маршы недармаедаў», які адбыўся ў Брэсце 5 сакавіка. Пачатак працэсу у Бярозе, 12.00.
У самім абласным цэнтры а 16:30 адбудзецца суд над удзельнікам маршу 5 сакавіка Андрэем Марачам. Ён ужо адседзеў 5 сутак за гэтую акцыю, але 17 сакавіка быў затрыманы каля ўласнага пад’езда і абвінавачаны ў дробным хуліганстве.
Праваабаронца Уладзімір Вялічкін лічыць, што актывістам будуць прысуджваць суткі, каб не дапусціць іх удзелу ў акцыях 25 і 26 сакавіка.
