Сытуацыя пагоршылася пасьля прыняцьця рашэньня аб тым, што нароўні са студэнтамі бюджэтнай формы на месцы ў інтэрнатах могуць прэтэндаваць і платнікі.
У новым навучальным годзе ў Менску ня больш за 70% студэнтаў, якія маюць патрэбу ў жыльлі, будуць забясьпечаны інтэрнатамі.
Як паведаміла начальнік упраўленьня разьвіцьця матэрыяльна‑тэхнічнай базы Міністэрства адукацыі Лідзія Зайцава, у мінулыя гады месцы ў сталічных інтэрнатах атрымлівалі прыблізна 80 % тых, хто меў патрэбу ў жыльлі. Сытуацыя пагоршылася пасьля прыняцьця рашэньня аб тым, што нароўні са студэнтамі бюджэтнай формы на месцы ў інтэрнатах могуць прэтэндаваць і платнікі. Акрамя таго, чатыры мінскія інтэрнаты закрыты на рэканструкцыю, у тым ліку інтэрнат БДУ на 1.200 месцаў. У найбліжэйшы час з эксплюатацыі выведуць яшчэ адзін інтэрнат БДУ на праспэкце Пераможцаў, разьлічаны на 600 месцаў.
«Сёлета праблему засяленьня ў інтэрнаты ўсіх студэнтаў, якія маюць патрэбу ў жыльлі, мы не вырашым», — падкрэсьліла спэцыяліст. Паводле яе слоў, у большасьці ВНУ правам першачарговага засяленьня будуць карыстацца ільготнікі і студэнты‑выдатнікі. Тым, хто не зможа засяліцца ў інтэрнаты, з пошукам кватэры паспрабуюць дапамагчы студгарадкі.
Паводле слоў Л.Зайцавай, забясьпечанасьць студэнтаў інтэрнатамі ўзрасьце да 90% бліжэй да 2011 года, калі жыхароў прыме студэнцкая вёска. Першы яе будынак — інтэрнат БДУ на 1 тыс. 300 месцаў — ужо будуецца. На ўсе работы выдзелена 43 млрд. рублёў. Інтэрнат плянуецца здаць у 2009 годзе.
Як паведаміла Л. Зайцава, летась забясьпечанасьць інтэрнатамі ў Беларускім дзяржаўным унівэрсытэце складала 80 %, Беларускім нацыянальным тэхнічным унівэрсытэце — 60 %, Беларускім дзяржаўным інстытуце інфарматыкі і радыёэлектронікі — 60 %, Беларускім дзяржаўным эканамічным унівэрсытэце — 97 %, Мінскім дзяржаўным лінгвістычным унівэрсытэце — прыблізна 50 %, Беларускім дзяржаўным пэдагагічным унівэрсытэце імя Максіма Танка — 43 %. Міжнародны дзяржаўны экалягічны унівэрсытэт імя Андрэя Сахарава не меў уласнага інтэрнату.
Паводле слоў Л. Зайцавай, у рэгіёнах сытуацыя крыху лепш. Летась студэнты Гомельскага і Гарадзенскага дзяржаўных унівэрсытэтаў, што маюць патрэбу ў жыльлі, былі забясьпечаныя інтэрнатамі на 70 %, Магілёўскага — на 90 %, Віцебскага — на 100 %. Стопрацэнтная забясьпечанасьць інтэрнатамі была таксама ў Полацкім і Баранавіцкім дзяржаўных унівэрсытэтах, Віцебскім дзяржаўным тэхналягічным, Берасьцейскім дзяржаўным тэхнічным унівэрсытэце і некаторых іншых рэгіянальных ВНУ.
Цяпер чытаюць
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным15
Каментары