На нарадзе па прыярытэтах замежнай палітыкі Беларусі пасол нашай краіны ў Кітаі Кірыл Руды звярнуў ўвагу кіраўніка дзяржавы на празмернасць мытнага надгляду пры перасячэнні мяжы Беларусі.
«Прэзідэнт найбуйнейшай турыстычнай карпарацыі Кітая, салідная дама, прыляцела ў Мінск. Як яна потым распавядала мне асабіста, яе ля трапа сустрэлі з таблічкай «віп», потым адвялі ў асобны пакой і сорак хвілін трыбушылі рэчы, пералічвалі кожную купюру ў кашальку, пераправяралі ўсе файлы ў яе асабістым камп'ютары. Праз два месяцы прыляцела яе працоўная група з журналістамі. І зноў галоўнае ўражанні ад краіны — гадзінныя праходжанні пашпартнага і мытнага кантролю. І гэта праз віп-канал», — распавёў Руды.
«Абсалютна вас падтрымліваю. Усе вашыя прапановы будуць не проста ўлічаны, па іх будуць прыняты рашэнні. А вось гэтыя факты, што мы пачынаем патрашыць злева направа людзей, якіх сюды запрасілі, гэта наогул», — абурыўся Лукашэнка.
На нарадзе гаварылася, што агулам за мінулы год за мяжу выязджала 122 мільёны кітайскіх турыстаў. Да Беларусі даехала 20 тысяч.
