У ёй — «Эцюд у пунсовым» і «Знак чатырох».
У выдавецтве «Янушкевіч» выйшла трэцяя кніга з серыі пра Шэрлака Холмса. У ёй пад адной вокладкай змешчаныя дзве аповесці Артура Конана Дойла — «Эцюд у пунсовым» і твор, які даў кнізе назву — «Знак чатырох».
Творы пра знакамітага дэтэктыва пераклалі на беларускую мову Кацярына Маціеўская і Ганна Янкута.
Кніга падрыхтаваная супольна з інтэрнэт-часопісам «ПрайдзіСвет» і з’яўляецца 13-м выданнем з серыі гэтага часопіса «PostScriptum».
Аповесці «Эцюд у пунсовым» (1887) і «Знак чатырох» (1890) — першыя творы пра дэтэктыва Шэрлака Холмса і яго памочніка доктара Уотсана, у якіх можна прачытаць не толькі пра экзатычныя злачынствы, але і пра абставіны знаёмства герояў у 1881 годзе, іх звычкі і сумесны побыт на Бэйкер-стрыт 221б, а таксама пра тое, што прымусіла сяброў у 1887 годзе раз’ехацца.
Дзеянне ў першым творы часткова адбываецца ў мармонскай супольнасці ў штаце Юта, у другім — у Індыі і на Андаманскіх астравах.
Аматарам савецкага серыяла апра Шэрлака Холмса з Васілём Ліванавым у галоўнай ролі аповесць «Знак чатырох» больш вядомая пад назвай «Скарбы Агры».
Дзве гэтыя аповесці адкрываюць цыкл гісторый пра Шэрлака Холмса і ўводзяць чытача ў прыдуманы Дойлам свет крымінальных загадак віктарыянскага Лондана. Абодва творы выходзяць па-беларуску ўпершыню.
У афармленні вокладкі «Знака чатырох», распрацаванай мастачкай Марыяй Мухінай, выкарыстаны фотаздымак 1902 года, на якім выяўлены генерал-губернатар Індыі Джордж Керзан з жонкай Мэры верхам на слане.
Раней па-беларуску выходзілі два зборнікі апавяданняў з цыкла пра Шэрлака Холмса: «Прыгоды Шэрлака Холмса» (2014) і «Нататкі пра Шэрлака Холмса» (2015). Першы зборнік змяшчае такія вядомыя гісторыі, як «Скандал у Багеміі», «Стракатая стужка», «Блакітны карбункул». Другі ж завяршаецца апавяданнем «Апошняя справа Холмса», у якім знакаміты дэтэктыў сутыкаецца з геніем злачыннага свету, прафесарам Марыярці, і ўступае з ім у бой ля Райхенбахскага вадаспаду.
Набыць кнігу можна ў выдавецкай інтэрнэт-кнігарні januskevic.by, а таксама ў кнігарнях Мінска.
Памерла палітзняволеная Алена Панкова. Паўгода назад яе асудзілі за ўдзел у пратэстах7
Каментары