Дэпутаты Вярхоўнай рады Украіны ўнеслі законапраект, у якім прапануецца ўвесці часовае абмежаванне для ўкраінцаў на паездкі ў Расію. Адпаведны дакумент апублікаваны на сайце парламента, паведамляе РБК.
«Выезд з Украіны грамадзян, якія з'яўляюцца дзяржаўнымі служачымі (акрамя работнікаў дыпламатычных службаў, або выезд з мэтай неадкладнай медыцынскай дапамогі або ўдзелу ў пахаваннях блізкага сваяка) у дзяржаву-агрэсар часова абмяжоўваецца», — сказана ў тэксце дакумента.
Як тлумачаць парламентарыі, расійскі бок можа ціснуць на грамадзян Украіны шляхам подкупу, шантажу або вярбоўкі. На іх думку, украінцаў могуць выкрадаць, катаваць, пазбавіць волі і нават жыцця, і ў такіх выпадках Украіна «не зможа забяспечыць абарону іх правоў».
Праект ўнеслі дэпутаты «Блока Пятра Парашэнкі» Андрэй Неміроўскі і Андрэй Шыньковіч, а таксама пазафракцыйны дэпутат Андрэй Дзенісенка.
Згодна з тлумачальнай запіскай, Украіна застаецца аб'ектам ваеннай агрэсіі з боку Расіі. Масква ажыццяўляе агрэсію шляхам «падтрымкі і забеспячэння маштабных тэрарыстычных нападаў». На думку дэпутатаў, Расія з 2014 года парушае нормы міжнароднага права.
«Нягледзячы на дыпламатычныя намаганні ў жэнеўскім, нармандскім і іншых фарматах, Расія не выконвае сваіх абавязацельстваў», — сказана ў тлумачэнні.
У пачатку верасня кіраўнік Службы бяспекі Украіны Васіль Грыцак прапанаваў заканадаўча забараніць наведванне Расіі украінскім дэпутатам, палітыкам і грамадскім дзеячам. Па яго словах, гэта ўмацуе дзеянне ўказа Пятра Парашэнкі аб унясенні Расіі ў спіс краін «міграцыйнай рызыкі». Грамадзянам краін з такога спісу з 2018 года пры ўездзе ў Украіну прыйдзецца праходзіць трохэтапную біяметрычную верыфікацыю.
Афіцыйны дакумент, у якім Расія прызнаецца краінай-агрэсарам, быў прыняты Вярхоўнай Радай 6 кастрычніка.
Цяпер чытаюць
Арыштаваны 75‑гадовы Зміцер Санько — ветэран-выдавец4
Каментары