Парламент Украіны прыняў у першым чытанні прэзідэнцкі законапраект аб асаблівасцях дзяржаўнай палітыкі па забеспячэнні суверэнітэту Украіны над непадкантрольнымі тэрыторыямі ў Данецкай і Луганскай абласцях. Напярэдадні яго разгляд скончыўся бойкай, паведамляе ВВС.
На пленарным пасяджэнні ў пятніцу за законапраект прагаласавалі 233 парламентарыі пры неабходным мінімуме ў 226 галасоў.
Згодна з дакументам Украіна фактычна адмаўляецца ад «антытэрарыстычнай аперацыі» на Данбасе. Расія названа «краінай-агрэсарам», а тэрыторыі т. зв. Данецкай і Луганскай народных рэспублік называюцца «часова акупаванымі».
Перад пачаткам галасавання спікер Вярхоўнай рады Андрэй Парубій нагадаў, што з законапраекта выключылі згадку аб мінскіх пагадненнях.
Законапраект змяняе структуру кіравання войскамі, якія дзейнічаюць у зоне баявых дзеянняў. Для стрымлівання і адпору ўзброенай расійскай агрэсіі ў Данецкай і Луганскай абласцях прэзідэнт Украіны Пятро Парашэнка прапануе стварыць аб'яднаны аператыўны штаб узброеных сіл Украіны.
Цяпер кіраўніцтва ваеннымі сіламі і сродкамі ў Данбасе ажыццяўляе штаб антытэрарыстычнай аперацыі, які падкантрольны Службе бяспекі Украіны, гэта абмяжоўвае магчымасць прымянення арміі.
У Маскве законапраект раскрытыкавалі. Расійскі прадстаўнік у мінскай кантактнай групе Барыс Грызлоў заявіў, што законапраект «цалкам супярэчыць мінскім пагадненням, яшчэ больш аддаляе Данбас ад Украіны і блакуе мінскі працэс».
Праціўнікі законапраекта ў знайшліся і ў Кіеве. Каля Вярхоўнай рады напярэдадні мітынгавалі актывісты.
У адміністрацыі Парашэнкі неабходнасць прыняцця закона тлумачаць тым, што з ім звязанае падаўжэнне санкцый супраць Расіі. Прэзідэнту Украіны прыйшлося адклікаць, карэктаваць і ўносіць законапраект зноўку.
Аднак і пасля гэтага крытыкі былі незадаволеныя. Асноўныя прэтэнзіі выклікаў артыкул, у якім ішла гаворка аб прыярытэтнасці выканання мінскіх пагадненняў.
«Гэтым пунктам мы ўпершыню ўводзім ва ўкраінскае прававое поле мінскія дамоўленасці, якія не з'яўляюцца крыніцай права», — тлумачыў дэпутат ад партыі Парашэнкі Мустафа Наем.
У чацвер Парашэнка прыехаў у Вярхоўную раду, каб пераканаць дэпутатаў сваёй фракцыі падтрымаць унесеныя ім законапраекты аб рэінтэграцыі Данбаса. Аднак у дэпутатаў паўстала мноства пытанняў да абодвух дакументах, у зале адбылася бойка, галасаванне было сарванае.
У выніку згадка аб мінскіх пагадненнях з законапраекта таксама была выключаная.
Не згодныя з законапраектам Парашэнкі і палітычныя сілы, якія не падтрымліваюць цяперашні палітычны курс. Апазіцыя напярэдадні блакавала трыбуну, пасля чаго было прынятае рашэнне перанесці разгляд законапраектаў на пятніцу.
«Гэты закон — не аб рэінтэграцыі Данбаса, а аб яго аддзяленні. І мы ні ў якім выпадку яго не падтрымліваем», — казаў раней кіраўнік фракцыі «Апазіцыйны блок» Юрый Бойка.
Пасля галасавання па законапраекце аб рэінтэграцыі Данбаса Вярхоўная рада падоўжыла на год тэрмін дзеяння закона аб асаблівым парадку мясцовага самакіравання ў асобных раёнах Данецкай і Луганскай абласцей.
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»8
Каментары