Канстытуцыйны суд Іспаніі афіцыйна прызнаў, што спрэчны рэферэндум аб незалежнасці Каталоніі з'яўляецца нелегітымным, бо рэгіянальны закон адносна плебісцыту супярэчыць Канстытуцыі краіны, паведамляе The Independent.
У пачатку верасня Каталонскі рэгіянальны парламент прыняў так званы «закон аб рэферэндуме адносна нацыянальнага самавызначэння». Пасля гэтага Канстытуцыйны суд Іспаніі часова прыпыніў дзеянне закона, пакуль суддзі ацэньвалі пярэчанні іспанскага ўрада. У сённяшнім рашэнні суд заявіў, што закон супярэчыць нацыянальнаму суверэнітэту і «непарыўнаму адзінству іспанскай нацыі».
Суд адзначыў, што парламенцкая сесія, якая зацвердзіла закон, таксама была незаконнай. Прэс-сакратар урада Каталоніі Жордзі Туруль сказаў, што ён не здзіўлены такому рашэнню.
«Мы сутыкаемся з выканаўчай уладай у дзяржаве, якая выкарыстоўвае юрыдычную галіну, каб заблакаваць заканадаўчую», — пракаментаваў судовае рашэнне Туруль.
Каментары