Старшыня праўлення Нацбанка Павел Калаўр быў хедлайнерам сёлетняга Кастрычніцкага эканамічнага форуму, які пачаўся ў Мінску 1 лістапада. У сваім выступе Калаўр запэўніў, што Беларусь працягне дыялог з МВФ, паведамляе tut.by.
«Самае вялікае дасягненне ў нас, як у медыкаў, — паставіць дыягназ», — адзначыў Калаўр, адказваючы на пытанне пра вынікі трох гадоў працы кіраўніком Нацбанка і 25 гадоў супрацоўніцтва з МВФ.
«Правесці дыягностыку, ацаніць глыбіню і прыярытэтнасць праблем — галоўнае. Спачатку трэба вырашаць праблемы больш высокага ўзроўню. Мы часта гэтага не да канца разумелі, і міжнародная экспертыза дапамагала. Эканамічны блок урада і Нацбанк ведаюць, што рабіць. Але грамадства павінна быць гатова да пераменаў», — падкрэсліў ён.
«Пытанне аб тэрміновым прыцягненні фінансавання, надзвычайных крэдытах ад МВФ не стаіць. Мы ў іх не маем патрэбы», — запэўніў кіраўнік Нацбанка.
Калаўр падкрэсліў, што цэнавая стабільнасць застаецца прыярытэтам Нацбанка, інфляцыя у 2018 годзе прагназуецца на ўзроўні 6% плюс-мінус адзін працэнтны пункт. Стаўка рэфінансавання ў наступным годзе павінна знізіцца нязначна, да 10%.
Кіраўнік місіі МВФ у Беларусі Пітэр Долман не застаўся ў даўгу і падзякаваў Калаўру, выказаўшы «асабістае прафесійнае захапленне».
Кастрычніцкі эканамічны форум праводзіцца ў Мінску ўвосені з 2013 года. Яго арганізатарамі выступаюць Даследчы цэнтр ІПМ пры ўдзеле Цэнтра эканамічных даследаванняў BEROC і Цэнтра сацыяльна-эканамічных даследаванняў CASE Belarus.
Цяпер чытаюць
«Некаторым людзям варта зняць ружовыя акуляры». Лявончык — пра Мельнікаву, уцечку ў «Байхэлп», белыя паліто і грошы на 1300 палітвязняў2
Каментары