У Баранавічах з дапамогай беспілотніка правяраюць, што робяць людзі на сваіх гародах
Адміністрацыйна-тэхнічная інспекцыя горада Баранавічы пачала ўжываць новы метад барацьбы з тымі, хто незаконна вядзе земляныя работы, раскопкі, паведамляе «Беларускі партызан» са спасылкай на партал «Наш край».
Беспілотны лятальны апарат верталётнага тыпу вертыкальнага ўзлёту і пасадкі «Шэршань» абследаваў тэрыторыю прыватнай забудовы ў раёне вуліцы Вільчкоўскага ў Баранавічах.
На вышыні 100—150 метраў беспілотнік кружыў над прыватнай забудовай, абследуючы землі, каб выявіць, дзе незаконна праходзяць земляныя работы. Выява перадаецца на пульт кіравання, затым адзнятыя фота- і відэаматэрыялы будуць разгледжаны спецыялістамі адміністрацыйна-тэхнічнай інспекцыі.
— Мы лічым гэта добрым метадам выяўлення раскопак, - тлумачыць Вячаслаў Козел, дырэктар адміністрацыйна-тэхнічнай інспекцыі. — У Баранавічах ужо былі трагічныя выпадкі, калі ў траншэях (падчас незаконных раскопак) пацярпелі людзі. Каб такія выпадкі не паўтараліся, земляныя работы павінны праводзіцца з дазволу адміністрацыйна-тэхнічнай інспекцыі і з выдачай неабходных рэкамендацый.
Выдача дазволу на правядзенне земляных работ абыдзецца ў 23 руб. 30 кап. А штраф за правядзенне раскопак без дазволу складае да 10 базавых велічынь. Такім чынам, лятальны апарат напэўна акупіцца.
Каментары