Беларускі баец ММА выйграў турнір і на прызавыя грошы зладзіў свята ў дзіцячым прытулку
Нядаўна беларускі баец змяшаных адзінаборстваў (ММА) Вадзім Куцы выйграў турнір Academy MMA Cup у сваёй катэгорыі, за паўтары хвіліны адолеўшы іспанца Хаўера Фуэнтэса.
Атрымаўшы ганарар за перамогу, Куцы паабяцаў сабе ахвяраваць грошы ў дзіцячы прытулак.
Даведаўшыся пра такое жаданне, яму вырашылі дапамагчы яшчэ з тузін людзей — знаёмых і спартоўцаў. І ўжо ў мінулую нядзелю хлопцы зладзілі свята для дзяцей з сацыяльнага прытулку Першамайскага раёна Мінска.
Пра гэта цяпер гаворыць уся спартовая супольнасць.
«Я не магу агучваць суму ганарара, якую выдаткаваў. — сказаў «Нашай Ніве» Куцы. — гэта наўрад ці спадабаецца кіраўніцтву. А чаму я так зрабіў? Па-першае, гэты прытулак праз дарогу ад залы, дзе я трэніраваўся ў дзяцінстве. Я восем год туды хадзіў, бегаў там, гуляў, бачыў гэтых дзяцей і разумеў, што ім мала пашчасціла. Ну і потым, як пасталеў, прыйшло жаданне дапамагчы. Па-другое, гэта быў мой першы бой у Мінску — раней біўся за мяжой, таму вырашыў, што калі дома перамагу — то аддам усё дзецям».
«Мы перадалі тэлевізар, фотаапарат, караоке-сістэму, мікрафон і калонкі, спартовы інвентар. Садавіны недзе на 100 кілаграм, цукеркі… Мы таксама дарылі кожнаму зімовы камплект вопраткі: шапка, куртка, швэдар, штаны, майка, пальчаткі… Плюс летні абутак: красоўкі ці шлёпанцы. Цацка кожнаму ў падарунак, ну і шоў-праграма была: два хаскі ўзялі, каб дзеці маглі цацкацца з імі, аквагрым быў, аніматар быў, клоўны і фокуснік, і адна дзяўчына бясплатна майстар-клас правяла», — падсумаваў баец.
Самому Вадзіму Куцаму 26 гадоў, у ММА ён правёў 12 баёў, у 11 перамог.
Цяпер чытаюць
Цягнік Пінск—Мінск спыніўся пад Дзяржынскам без ацяплення. Пасля прыбыцця ў сталіцу пасажыраў разабралі людзі з сацсетак і развезлі па хатах8
Каментары