Недалёка ад французскага вострава Рэюньён у Індыйскім акіяне берагавая ахова выратавала 54-гадовага польскага марака. Паводле ягоных словаў, ён каля 7 месяцаў дрэйфаваў разам са сваім катом на сапсаванай невялікай яхце паміж выспамі Інданэзіі, Мальдзіваў і Маўрыкія, паведамляе партал Interia.pl
Як паведамляе радыё FranceInfo, выратаванага мужчыну клічуць Збігнеў Рэкет, і ён выплыў у мора з Каморскіх выспаў, якія знаходзяцца паміж Мадагаскарам і афрыканскім кантынентам, маючы намер даплыць да Паўднёвай Афрыкі, дзе хацеў знайсці працу.
Збігнеў Рэкет. Фота — AFP
Яхта, аднак, зламалася, а яе ўласнік згубіў пры гэтым сродкі сувязі і навігацыі. Адзінай ежаю на борце для яго і ката быў кітайскі суп у пакеціках. Зараз марак збіраецца самастойна адрамантаваць сваю яхту, каб працягваць свой шлях.