У Тайландзе ўваходзіць у моду адбельванне чэлеса і полавых губаў. Навошта?
У Тайландзе набірае папулярнасць адбельванне чэлесаў, і гэтая навамодная тэндэнцыя выклікае шмат у каго шчырае здзіўленне. Адбельванне скуры даўно ўвайшло ў моду ў краінах Азіі, дзе смуглявасць асацыюецца з фізічнай працай на адкрытым паветры і, адпаведна, з галечай. Але адбельванне чэлеса — гэта нешта новае.
Што кіруе людзьмі, якія ідуць на такую працэдуру?
«Я хацеў больш упэўнена адчуваць сябе ў плаўках», — сказаў Тайскай службе Бі-бі-сі пацыент, што нядаўна прайшоў працэдуру адбельвання. 30-гадовы мужчына распавёў, што першы этап (а іх усяго пяць) ён прайшоў два месяцы таму, і з тых часоў заўважае змены ў колеры сваіх геніталіяў.
Поўны курс асвятлення чэлеса каштуе 650 даляраў.
У сваёй рэкламе на фэйсбуку клініка, якая аказвае гэтыя паслугі, тлумачыць, што яе спецыялісты з дапамогай лазера зніжаюць колькасць пігмента меланіну ў эпідэрмісе пацыента, што і прыводзіць да асвятлення скуры.
За два дні гэты пост са здымкамі і ілюстрацыямі, якія паказваюць працэс, сабраў больш за 19 тысяч рэпостаў. Каментары розныя: ад непрымання і крытыкі да здзіўлення і жартаў. Многія пытаюцца: навошта?
Адна дзяўчына напісала, што не разумее, чаму так бурна абмяркоўваецца колер, бо ёй заўсёды здавалася, што ён не мае значэння.
Дырэктар па маркетынгу Lelux Hospital распавёў Бі-бі-сі, што чатыры месяцы таму клініка пачала праводзіць таксама адбельванне жаночых геніталій.
Штомесяц сюды звяртаюцца 20—30 мужчын і жанчын. Некаторыя прыязджаюць з М'янмы, Камбоджы і Ганконгу.
Міністэрства аховы здароўя Тайланда заклікае людзей захоўваць здаровы сэнс і памятаць пра пабочныя эфекты: запаленні, шнары і боль.
Да таго ж, як сцвярджаюць медыкі, эфект асвятлення з часам знікне. Натуральны колер скуры вернецца, але праз перажытае ўздзеянне пігмент можа размеркавацца няроўна, брыдкімі плямамі.
«Лазернае адбельванне чэлеса нікому не трэба, гэта дарэмная трата грошай і рызыка атрымаць больш негатыўных, чым чаканых вынікаў», — заявіў міністр аховы здароўя Тайланда Тонгчай Кіратыхутаякорн.
У апошнія дзесяцігоддзі адбельванне скуры стала вельмі папулярным у краінах Паўднёва-Усходняй Азіі. У Lelux Hospital кажуць, што больш за палову іх пацыентаў звяртаюцца менавіта па гэта.
У згаданым рэгіёне больш светлая скура азначае, што чалавек не належыць да рабочага класу і не працуе ў полі.
На рынку існуе мноства касметычных сродкаў для адбельвання скуры, рэклама якіх у розны час правакавала скандалы і бурныя абмеркаванні ў грамадстве. Пры гэтым у апошні час праблема дыскрымінацыі па колеры скуры ў Тайландзе ўжо не такая вострая, як раней.
Каментары