Белстат заявіў, што на заробкі за мяжу выехала рэкордная колькасць беларусаў. МУС кажа, што ўсё наадварот

У 2024 годзе на заробкі за мяжу на кароткі тэрмін, то-бок да года, выехала рэкордная з 2014 года колькасць беларусаў. Паводле звестак Белстата, на заробкі паехалі 112,4 тысячы беларусаў. Гэта на 2 тысячы перавышае ўзровень 2023 года. 

Калі б у Белстата быў інструмент падліку выехаўшых на даўжэйшы час (такая катэгорыя часта едзе з сям'ёй, таму анкету ў Беларусі запоўніць няма каму), то выйшла б яшчэ большая лічба працоўнай міграцыі, зазначае «Беларусы і рынак».

Лідарам стала Магілёўская вобласць, адкуль выехала 25,2 тысячы чалавек. У Мінску налічылі дзве з паловай тысячы працоўных мігрантаў.

Цікава, што МУС рапартуе пра дыяметральна супрацьлеглую тэндэнцыю. Паводле звестак міністэрства, усё менш беларусаў едуць рабіць за мяжу. Але МУС аналізуе толькі афіцыйнае працаўладкаванне праз агенцтвы.

У 2024 годзе афіцыйна на працу за мяжу паехала 3,5 тысячы беларусаў — на тысячу чалавек менш, чым годам раней. 

Больш за ўсё па зарэгістраваных дамовах паехала жыхароў Мінска — 1350 чалавек за год. Натуральна, што сярод рэгіёнаў лідзіруе самы маланаселены — Магілёўская вобласць: за 2024 год адсюль з’ехала 957 зарэгістраваных мігрантаў. Для параўнання, з Гродзенскай вобласці — толькі 23 чалавекі.

Афіцыйная працоўная міграцыя ідзе збольшага ў двух кірунках — Расія (1,6 тысячы чалавек) і Польшча (1,2 тысячы). Аднак паток у гэтыя краіны, як і ў большасць іншых, паводле звестак МУС, скараціўся.

Адзіны растучы напрамак — гэта Германія: сюды скіраваліся 168 беларускіх работнікаў, тады як годам раней было толькі 14. Самыя сур’ёзныя зніжэнні паказала Літва: туды змаглі афіцыйна паехаць толькі 26 чалавек, а ў 2023 годзе колькасць даходзіла да 330. Значная колькасць таксама рушыла ў ЗША (132 чалавекі) і Арабскія Эміраты (89).

Большасць адыходнікаў сталі рабочымі ў прамысловасці або сельскай гаспадарцы — 72%. Яшчэ 24% — у сферы абслугоўвання. У якасці кваліфікаваных работнікаў змаглі афіцыйна ўладкавацца 125 чалавек, кіраўнікамі — 11 чалавек.

70% усіх выязджан — гэта мужчыны. Аднак натуральна, што перавагу мужчын забяспечылі два асноўныя кірункі — Расія і Польшча. Тады як сярод мігрантаў у большасць астатніх краін пераважаюць жанчыны. Напрыклад, у Кітай на заробкі з’ехалі толькі жанчыны, у Эміраты — на 90% жанчыны.

Большасць дамоваў была заключана на тэрмін да 6 месяцаў (1,7 тысячы) і на больш за год (1,2 тысячы). Пры гэтым у Расію ў асноўным ездзяць на кароткі тэрмін, тады як у Польшчу — на доўгатэрміновы.

• 6
• 0
• 7
• 4
• 3
• 2
• 0
• 0