На экстраным пасяджэнні Рады Бяспекі ААН, скліканым у сувязі з меркаванай хімічнай атакай у прыгарадзе Дамаска, прадстаўніца ЗША Нікі Хэйлі заявіла, што Расія вінаватая ў гібелі мірных жыхароў у Сірыі.
Пасяджэнне было склікана па ініцыятыве дзевяці членаў арганізацыі — Вялікабрытаніі, Францыі, ЗША, Польшчы, Нідэрландаў, Швецыі, Кувейта, Перу і Кот-д'Івуара.
Захад абвінавачвае рэжым сірыйскага прэзідэнта Башара Асада ва ўжыванні хімічнай зброі супраць мірнага насельніцтва на тэрыторыі Думы — аднаго з населеных пунктаў Усходняй Гуты ў прыгарадзе Дамаска.
Паведамлялася пра гібель дзясяткаў людзей. Ва ўсіх загінулых былі сімптомы, якія паказвалі на прымяненне хімічных атрутных рэчываў.
Расія заявіла, што доказаў хімічнай атакі няма. Улады Сірыі палічылі абвінавачванні ў адрас сірыйскай арміі непераканаўчымі.
Прэзідэнт ЗША Дональд Трамп заявіў, што прыме рашэнне па сірыйскім пытанні да 12 гадзін серады па часе Усходняга ўзбярэжжа.
Хэйлі падкрэсліла: яна не ставіць пад сумнеў інфармацыю аб хімічнай атацы ў Сірыі. Яе арганізатара яна назвала пачварай: «Злучаныя Штаты поўныя рашучасці зрабіць так, каб монстр, які ужыў хімічную зброю супраць сірыйскіх дзяцей, панёс пакаранне».
Дыпламат таксама адзначыла, што ўжо казала пра жахі хімічных нападаў ў 2017 годзе і, апісваючы ў Радзе Бяспекі ААН выгляд мёртвых сірыйскіх дзяцей, «малілася, каб гэта ніколі не давялося рабіць ізноў».
Паводле яе слоў, няма сэнсу казаць пра гэта зноў — пасля яе леташняга даклада «ніводны ўрад не павінен быў бы мець справы з Сірыяй». Хэйлі таксама заявіла, што «рукі Расіі - ў крыві сірыйскіх дзяцей, а іранскія сілы робяць астатнюю брудную працу».
Цяпер чытаюць
«Дэкаланізацыя — гэта прыйсці і заняць сваё месца». Наста Рагатко будзе ўдзельнічаць у фестывалі расійскай кнігі. Суліма яе асудзіў, яна не змаўчала ў адказ6464
Каментары