Жыхар Мядзельскага раёна паведаміў у міліцыю, што двое знаёмых адвезлі яго ў лес, збівалі і патрабавалі грошы, але яму ўдалося збегчы.
Высветлілася, што мужчына, які тэлефанаваў у міліцыю, са сваім таварышам напярэдадні ў доме рамантавалі печку. Узнагародай за дапамогу стала выпіўка.
На наступны дзень гаспадар дома з кватарантам пачаў кеміць з нагоды чарговай дозы спіртнога. У іх ўзнікла ідэя, што пасля ўчорашняга застолля павінны былі заставацца 50 рублёў. Знайсці іх не змаглі. Вырашылі, што грошы ўзялі ўчорашнія работнікі.
На машыне мужчыны адправіліся на іх пошукі. Калі знайшлі, то абодвух сілай пасадзілі ў машыну і павезлі ў лес.
Прывезлі «даўжнікоў» у лес каля вёскі Азаркі. Там мужчыны сталі патрабаваць вяртання грошай, перыядычна біць знаёмых. Зламыснікі палічылі, што збіцця будзе недастаткова і прывязалі ахвяру палявання адрэзаным рамянём бяспекі да фаркопа аўтамабіля. Пасля гэтага праехалі некалькі сотняў метраў па лясной дарозе, затым паклалі яго ў багажнік машыны.
Другі пацярпелы, знайшоўшы момант, збег. Яго таварыша вяскоўцы павезлі да сябе дадому для працягу катаванняў. Адтуль ён здолеў уцячы і патэлефанаваць у міліцыю.
Пацярпелы з закрытай чэрапна-мазгавой траўмай і пераломамі быў шпіталізаваны.
Крыўдзіцеляў заяўніка — 30-гадовага мужчыну і яго 34-гадовага прыяцеля — затрымалі па месцы жыхарства.
Падазраваныя знаходзяцца ў ізалятары часовага ўтрымання. Ім пагражае да 3 гадоў.
Хто ўсё ж узяў грошы, не паведамляецца.
