Гэтым разам мы працягнем нашыя спробы захаваць смак лета і зробім з вамі вяленыя таматы. Я яшчэ не сустракала чалавека, якому б яны не спадабаліся — ідэальны варыянт на заедак, як дадатак да піцы ці макароны.
У краіне паходжання гэтай стравы, Італіі, таматы сушацца проста на сонцы на працягу некалькіх дзён. І хоць мы не можам пахваліцца такой жа колькасцю сонечных дзён, мы лёгка можам сябе папесціць іх кулінарным здабыткам. Усё, што нам спатрэбіцца, гэта таматы і цярплівасць, бо працэс вялення займае час.
Лепш за усё браць памідоры гатунку «сліўка» ці «дамскія пальчыкі», бо менавіта ў іх большы адсотак мякаці.
Нам спатрэбіцца:
- 2 кг памідораў
- 150 мл аліўкавага алею
- 1 зубчык часнаку
- 1 ч. л. віннага воцату
- арэгана
- соль
Памідоры мыем, рэжам на палавінкі, выдаляем пладаножку. Пасыпаем соллю і адстаўляем на некаторы час. Зліваем сок, які выдзеліўся з таматаў, прамакваем папяровым рушніком. Калі вы хочаце, каб таматы завяліліся хутчэй, можна выдаліць насенне і усю мякаць, пакінуўшы толькі сценкі. Але я асабіста пакідаю ўсё, мне здаецца, так яны больш смачныя. Выкладаем палоўкі на бляху з пергаментам, пасыпаем сухім арэгана і трохі апырскваем алеем.
Памідоры вялім 5—6 гадзін у духоўцы пры тэмпературы 100 градусаў з рэжымам канвекцыі (калі ёсць).
Робім заліўку, падобную на тую, што рабілі для перцаў у мінулы раз. Дробна рэжам часнок, змешваем яго з воцатам і алеем.
Гатовыя таматы зменшацца ў памеры і зменяць колер на больш цёмны. Перакладаем іх у слоік і заліваем заліўкай. Захоўваем у халадзільніку.
Духмяны алей, што застанецца ад таматаў, я потым выкарыстоўваю для іншых страў. Смачна есці!
Цяпер чытаюць
Што вядома пра затрыманых радыёаматараў, якім пагражае аж да расстрэлу5
Каментары