Чытач Аляксандр Лапко даслаў «НН» здымкі, зробленыя ягонай знаёмай 23 верасня ў будынку Вялікай харальнай сінагогі ў Гродне. На іх — сувенірная лаўка, у якой прадаецца майка з выявай прэзідэнта Расіі Уладзіміра Пуціна. На майцы наступны надпіс: «Біць буду асцярожна, але моцна».
У самой сінагозе нам спачатку сказалі, што такога быць не можа і нічога ў іх не прадаецца. Аднак падчас другога тэлефанавання прызналі, што ў будынку сінагогі маецца сувенірная крамка.
Яе ўласніца Алена ў каментары для «НН» сказала, што яны вырабляюць «любыя майкі на замову». Маўляў, гэтую нават і не планавалі прадаваць, проста замоўшчык спазніўся на адзін дзень, то майку было вырашана выставіць на продаж.
«Нейкі чувак замовіў, у нас ні тэлефонаў ягоных не было, нічога. То і вывесілі на продаж. На наступны дзень ён яе забраў», — адказала Алена. Маек з выявай Лукашэнкі ў гэтай сувенірнай крамцы няма.
У самой сінагозе нам сказалі, што не цікавяцца тым, што прадаецца ў краме.
Каментары