Экскурсавод у Нясвіжскім палацы назвала беларускую мову сялянскай
На экскурсіі для расійскіх турыстаў па Нясвіжскім палацы экскурсавод назвала беларускую мову «польскім дыялектам». Сведкам гэтага стаў фізік Ягор Лебядок, перадае «Еўрарадыё».
«Экскурсавод крыху сапсавала настрой («белорусский язык начал формироваться в середине XIX века», «белорусский язык — это диалект польского языка», «белорусский язык — крестьянский язык», «Статут ВКЛ написан на церковном языке или на старославянском языке» і т.п. трызненне», — дзеліцца ўражаннямі Ягор.
Падобныя заявы могуць пацягнуць разбіральніцтва па артыкуле 9.22 Адміністрацыйнага кодэкса — прэцэдэнты ўжо былі. За публічную знявагу дзяржаўнай мовы ў Беларусі можна атрымаць штраф да 245 рублёў ($120).
Экскурсія, пра якую ідзе гаворка, адбывалася ўдзень 25 кастрычніка. Каб разабрацца ў сітуацыі, Еўрарадыё звязалася з кіраўніцтвам запаведніка «Нясвіж».
«Усе экскурсаводы правераныя і ніякай адсябеціны быць не можа, — кажа дырэктар запаведніка Сяргей Клімаў. — Гэта дзікунства. Калі інфармацыя пацвердзіцца, дык супрацоўнік больш працаваць не будзе. У нас праводзіцца тэставанне супрацоўнікаў… Звальняем за меншае: той, хто глядзіць на гадзіннік і выправаджвае людзей з залаў, — адразу звальняецца».
Цяпер чытаюць
«Яна была спартыўнай дзяўчынай». Што вядома пра загінулую пасажырку дэльтаплана, які ўпаў пад Мінскам1
Каментары