Хлопец расклеіў па Мінску чатыры тысячы аб’яў пра тое, што шукае дзяўчыну. Што з гэтага атрымалася?
На пачатку красавіка па ўсім Мінску людзі пачалі заўважаць шмат аднолькавых аб’яў. Прычым не самых звыклых для нашага часу.
На іх — фота 19‑гадовага Лёшы і тэкст пра тое, што ён шукае дзяўчыну. Як ён вырашыўся на такую задуму і што з гэтага атрымалася, піша Onliner.by.
Улётак для знаёмстваў Лёша надрукаваў каля 4000. Расклейваць іх хлопцу дапамагала каманда з 13 чалавек. Займаліся гэтым прыкладна тыдзень.
— Навіны пра гэта трапілі ў розныя паблікі, людзі пачалі пісаць мне ў асабістыя паведамленні і ў сацсетках.
Усяго за два тыдні адгукнулася прыкладна 400 чалавек, — усміхаецца Лёша.
Але на спатканні ён схадзіў толькі з трыма дзяўчынамі. Чаму так? Тут Лёша прызнаецца, што пошук кахання быў не адзінай мэтай яго смелага ўчынку.
— Мне хацелася стварыць нейкі рух, паглядзець, што з гэтага атрымаецца. Спрабаваць знайсці дзяўчыну з дапамогай папяровых аб’яў — вельмі арыгінальны, але зусім не выгадны спосаб знаёмства. Прасцей ужо на вуліцы падыходзіць да тых, хто спадабаўся — толку, напэўна, было б больш.
Аказваецца, у Лёшы ёсць уласны блог на YouTube, на які падпісаныя 97 тысяч чалавек. Хлопец праводзіць розныя чэленджы — напрыклад, прыходзіць на спатканне ў суправаджэнні мамы або надзявае на ногі ўцяжарвальнікі і жыве з імі 50 дзён — і здымае пра гэта відэа. Ролікі набіраюць сотні тысяч праглядаў.
Так што пошук дзяўчыны праз аб’явы — таксама своеасаблівы эксперымент Лёшы як блогера. Дарэчы, год таму ён ужо праводзіў падобны, толькі менш маштабны, і таксама здымаў пра гэта кантэнт. Аднак хлопец падкрэслівае: рамантычны складнік у гэтай справе ўсё ж ёсць.
— Сэнс гэтых аб’яў быў шырэйшы, чым проста пошук дзяўчыны. Мы з сябрамі за гэты час згуртаваліся і зрабілі свой унёсак у гісторыю Мінска. Людзі глядзелі на гэтыя лістоўкі, усміхаліся, перасылалі адзін аднаму… атрымлівалі пазітыўныя эмоцыі. Гэта ж крута!
І так, той самай, якая ў выніку запала ў сэрца Лёшы, стала адна з яго памочніц у расклейванні аб’яў. Падрабязней пра гэта ён абяцаў расказаць на сваім YouTube-канале.
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары