«Наш цуд здарыўся!» Збор на ўкол «Залгенсма» для Даніка з Баранавічаў закрыты
Міністэрства аховы здароўя дадасць рэшту сумы — каля 800 тысяч долараў.
Жыхары не толькі Баранавічаў, але і ўсёй Беларусі ўдзельнічалі ў зборы, які быў адкрыты для малога Даніка Асыкі. У хлопчыка СМА 3‑га тыпу, і ён мае патрэбу ў прэпараце «Залгенсма». Яго цана — 1,8 млн долараў.
Збіралі грошы ўсім светам: праходзілі дабрачынныя латарэі, кірмашы ў падтрымку Даніка, ахвяраваў кожны колькі можа. Да гэтага дня было сабрана больш за палову неабходнай сумы, піша «Наш край».
— На тым тыдні з намі звязаліся прадстаўнікі Міністэрства аховы здароўя, РНПЦ «Маці і дзіця», сказалі, што будуць чакаць нас для здачы аналізаў на антыцелы 14 красавіка. Мы прыехалі, здалі аналізы. Потым адбыўся кансіліум. Мы пагутарылі з юрыстам наконт збору сродкаў, і нам сказалі, што рэшту сумы, якой не хапае, бярэ на сябе Міністэрства аховы здароўя. Наш цуд здарыўся! Збор закрыты! — падзялілася мама Даніка Ксенія. — Сказаць, што я шчаслівая — не сказаць нічога.
Такую ж неацэнную дапамогу атрымаў ад Міністэрства аховы здароўя і другі баранавіцкі хлопчык — Саша Астрога, які атрымаў запаветны ўкол і праходзіць рэабілітацыю.
Прэпарат для Даніка ўжо замоўлены, і ён зможа атрымаць яго ў найбліжэйшы час.
— У мяне проста няма слоў… Сёння той самы дзень, пра які мы марылі кожную хвіліну нашага шляху. Я хачу сказаць велізарны дзякуй кожнаму. За кожны рэпост, за кожны перавод, за кожнае добрае слова ў каментарыях. Вы былі нашай апорай, калі станавілася страшна, і нашай надзеяй, калі сіл амаль не заставалася. Дзякуй, што не прайшлі міма, што сталі нашай сям'ёй і дапамаглі Даніку зрабіць гэты найважнейшы крок, — дзякуе Ксенія. — Без вас мы б не справіліся. Данік перадае кожнаму праменьчыкі дабра!
Збор жа для для трохгадовай Ксюшы Маісеенкі працягваецца. Засталося сабраць зусім мала — 29 тысяч даляраў.
Часу ў запасе няшмат: у Беларусі прэпарат «Залгенсма» ўводзяць дзецям вагой да 13,5 кілаграма. У Дубаі гатовы ўвесці прэпарат, калі дзіця важыць да 21 кілаграма.
Інфармацыю, як дапамагчы Ксюшы, можна знайсці тут
Цяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі26
Каментары