Некалькі дзён таму сышоў у адстаўку намеснік начальніка Дэпартамента выканання пакаранняў Сяргей Сандалюк. Ён адказваў за ідэалагічную працу і кадравае забеспячэнне.
Паводле інфармацыі на сайце МУС, цяпер гэта пасада вакантная.
Блогер Нехта (супрацоўнік «Белсата» Сцяпан Пуціла) у сваім тэлеграм-канале напісаў, што да адстаўкі мог прывесці гей-скандал у ведамстве. Аўтар падкрэсліў, што інфармацыя непацверджаная.
Сам Сандалюк сцвярджае, што проста выйшаў на пенсію. «Выбіраю сабе новую працу, прапановаў шмат», — пракаментаваў ён сітуацыю «Нашай Ніве».
Ці звязаны яго сыход з нейкай гісторыяй з кіроўцам? «Кіньце, не верце чуткам», — заявіў ён.
Крыніцы «Нашай Нівы» сцвярджаюць, што кіроўца Сандалюка трапіў у непрыемную сітуацыю, звязаную з прымяненнем сілы, і расказаў пра гэта начальніку. Той пагадзіўся дапамагчы падначаленаму, каб таго не прыцягнулі да адказнасці, аднак задума правалілася.
* * *
Сяргей Сандалюк раней кіраваў в/ч 7404 у Баранавічах, якая спецыялізуецца на канваіраванні асуджаных.
Каментары