«Бруснічка» спыняе сваю працу?

Кампанія «Еўрагандаль» згортвае сваю сетку дыскаўнтараў «Бруснічка». Такую выснову можна зрабіць з дынамікі колькасці гандлёвых аб'ектаў, зарэгістраваных у гандлёвым рэестры, а таксама з інфармацыі на афіцыйным сайце сеткі.

Мабыць, найбуйнейшы ў Беларусі рытэйлер расчараваўся ў фармаце мяккага дыскаўнтара і вырашыў засяродзіцца на развіццё свайго найбуйнейшага брэнда «Еўраопт» і новай сеткі жорсткіх дыскаўнтараў «Хіт! Экспрэс», запушчанай у канцы мінулага года.

Калі параўноўваць дадзеныя гандлёвага рэестра за ліпень і лістапад 2018 года, то колькасць крам, якія працуюць пад ГМ «Бруснічка», скарацілася са 102 да 70 гандлёвых аб'ектаў.

У розных СМІ ў апошні час з'яўляюцца навіны пра тое, што крамы, якія працавалі пад шыльдай «Бруснічка», пераймяноўваюцца ў «Еўраопт» або атрымліваюць назву новай сеткі дыскаунтараў «Хіт! Экспрэс».

Так, да прыкладу, яшчэ ў снежні мінулага года выданне «Медыя-Палессе» паведаміла, што «Еўрагандаль» закрыў у Пінску краму «Бруснічка» на вуліцы Цэнтральнай і адкрыў на яго месцы «Еўраопт Маркет». Супрацоўнікі паведамілі выданню, што гандлёвы аб'ект у старым фармаце не прыносіў прыбытку.

Некалькі дзён таму гродзенскі партал NewGrodno.by паведаміў, што дыскаўнтар «Бруснічка» на вуліцы Савецкіх Пагранічнікаў, 118 памяняў шыльду і атрымаў ранейшую назву «Еўраопт». Такім чынам, пасля 16 месяцаў працы новай сеткі ў Гродне не засталося ні адной крамы сеткі «Бруснічка».

На афіцыйным сайце «Бруснічкi» ў раздзеле «Крамы» на 2 сакавіка 2019 года значыцца толькі адзін магазін у Гомельскай вобласці.

У кампаніі пакуль не каментуюць сітуацыю і не паведамляюць аб планах рытэйлера наконт далейшага лёсу «Бруснічкi».

Нагадаем, што сетка крам сеткі «Бруснічка» была запушчана ў жніўні 2017 года. Сетка працавала ў двух фарматах — міні-дыскаўнтар і звычайны дыскаўнтар. У міні-дыскаўнтарах асартымент уключаў 1800 найменняў, уключаючы малочныя, мясныя і каўбасныя вырабы, свежую гародніну і садавіну, а таксама бакалею і нехарчовыя вырабы. Асартымент стандартнага дыскаўнтара — 2700 таварных пазіцый.

У крамах сеткі прапаноўваўся больш вузкі асартымент тавараў па акцыйных цэнах у іншых сетках. Розніца цэн складала да 40%.

Аднак дадзены фармат, хутчэй за ўсё, не апраўдаў сябе, і рытэйлер ў снежні мінулага года вырашыў запусціць новую сетку дыскаўнтараў пад назвай «Хіт! Экспрэс».

Новая сетка працуе ў фармаце жорсткага дыскаўнтара з вузкім асартыментам і адсутнасцю на паліцах скорапсавальных прадуктаў. У асартыменце — бакалея, кандытарскія вырабы, прамтавары, алкагольная прадукцыя.

Да канца зімы рытэйлер абяцаў запусціць больш за 40 магазінаў пад гэтай гандлёвай маркай па ўсёй Беларусі.

• 0
• 0
• 0
• 0
• 0
• 0
• 0
• 0